21
Ejit ogwu ubọọn̄ ìkup me akajit ubọk Okumugwemkubọk mun̄ emen okolo,
ìkida ejit ya ikana inin̄ agan̄ geelek òneneme ọmọ.
2 Inu geelek ene okirọ ìkitatat me chieen̄ ogwukaan̄,
ire, îre Okumugwem okiwọlọ inu òkup ene me ejit ikpọ.
3 Ata irọrọ mè inu ònenen,
înwọn me lek Okumugwem igak ngwugwa.
4 Ikpọkpọ ene chieen̄ isiki mè ugumulek,
òrere inu ebi ikpak ekisa iluk ugwem kiban̄,
ìre ijo inu.
5 Otitọt ebi ìkisiki lek irọ ikwaan̄ okisibi oruru,
ire, eyi ebi gbamgbam ìkisa ugbọọn̄ inu.
6 Inu ubọọn̄ esabe ngan ikaan̄, ìre oruk òboniniin̄ ichep,
mè ire ufe môsabe mkpa ijet ene.
7 Inu afa ebi ikpak ekirọ môtet ema kubọk ufe,
mije, ema ekijit irọrọ inu ònenen.
8 Ogwu oyerebet otipbe, ìkirọ inu kan̄ kọnọkọnọkọnọ,
ire, ogwu ubọk otanabe, eru kan̄ ìkinenen.
9 Ene iluluk ọmọ gaalek me otu utọn̄
inyọn̄ otoon̄-uwu ikimeen̄ urọt ataak,
înwọn igak iluluk me emen uwu
melek enenwaan̄ òkinwọọn̄ ibaak.
10 Ene ikpak ìkakitele inu ikpak,
ìkakikaan̄ nsan me lek ogwu melek kan̄.
11 Ogwu òchak ene isibọkọ osusut,
ogwu una ekiket îra iriọọn̄ inu,
ire, ogwu òriọọn̄ inu isibọkọ ikween̄-inu,
îra ikaan̄ ifuk-ibot.
12 Ogwu Ata Irọrọ ìkigwuun̄ chieen̄ me emen uwu ebi ikpak,
môtọp ema ikana ikook me emen inu ikpak kiban̄.
13 Ogwu òchit utọn̄ mgbọ ogwu ugbọọn̄
okitaan̄ ukpo iweek ntap-ubọk,
ọmọ isiyaka itaan̄ ukpo eyi kan̄,
kpunu si ogwu òbofọọk ọmọ otu.
14 Uche enyibe me nlelet ìkisiki unaan̄-ejit,
ikpoko udun̄ echitbe me ekwut inyi,
ìkisuuk uyok unaan̄-ejit.
15 Irọrọ inu ònenen, ìkinyi ebi ata irọrọ ubelejit,
ire, ìkitap ebi ijo irọrọ uga ufieejit me emen.
16 Ogwu òtetele oniin̄ ebi ìriọọn̄ lek,
ìbosi isiki efuuk melek ebi ìkwakwaan̄.
17 Ogwu òkinwọọn̄ utop otu, môkana ugbọọn̄,
ogwu òkinwọọn̄ miin̄ mè aran̄, ìkponin̄ ubọọn̄.
18 Mêsa ebi ikpak inwene ibot ebi ata irọrọ,
mè isa ebi mfufiọk inwene ibot ebi ìkirọ inu òtatat.
19 Iluluk me emen èwê,
înwọn igak iluluk melek enenwaan̄
òkinwọọn̄ ibaak mè unaan̄-ejit.
20 Aran̄ mè inu utop otu geelek
ìkakinan me uwu ogwu òriọọn̄ inu,
ire, ogwu mbubut ìkirerie inu geelek îkaan̄be isan̄a kpai.
21 Ogwu òkilibi igọọk ata irọrọ mè ata ejit,
môkaan̄ ugwem mè ata irọrọ mè ulibi.
22 Ogwu òriọọn̄ inu okikọt itim ikpan̄ ama ebi usọ akọn̄,
mè igbugbọ okwukwek akọn̄ cha
ema esabe ikitoon̄ ejit, igwook.
23 Ogwu òtetet otu kan̄ mè alọm kan̄ ikaan̄,
ìsan̄a lek kan̄ me emen ogbogbo ufialek.
24 Ogwu ugumulek òkikpọ ene chieen̄ isiki,
ìre ogwu òchak ene,
ìkirọ inu kan̄ ugumu ugumu mè ubene ubene.
25 Ijo ebek okikpan̄ ogwu ugbek,
mije, ubọk kan̄ ìkakire lek ikwaan̄.
26 Usen geelek ìkikakaan̄ ebek ile,
ire, ogwu ata irọrọ ìkinyinyi, ìkakitele ubọk.
27 Ngwugwa ebi ikpak ìre mbuban inu,
ògak ge, ire isa ijo ekiket me ejit iben inu.
28 Ogwu ata-ikọ ataak mônin̄ me ichep,
ire, ogwu ata-ikọ òkigban̄ utọn̄ ijaan̄,
mêtele ibe ikpọkpọ ikitumu ikọ.
29 Ogwu ikpak ìkinwenwe chieen̄,
ire, ogwu òtatat me ugwem ìkigbagbala chieen̄
me inu geelek îkirọ.
30 Kpunu iriọọn̄-inu, mè ìre ngobo-ntet, mè ìre nteme,
òbokọt ikeke ida Okumugwem.
31 Ekibala inyinya isun̄ iban usen akọn̄,
ire, ntim-mkpan̄ ìkup me ubọk Okumugwem.