20
Miin̄ ìkirọ ene ochak, miin̄ ukan̄ ìkirọ ene itap okput,otutuuk ebi geelek miin̄ osabe kpekaan̄ iriọọn̄-inu.
2 Unaan̄-ejit ogwu ubọọn̄ ìkup kubọk egbe àtat okigbin,
Ogwu òsi ìribi ọmọ unaan̄-ejit ìbosa ugwem kan̄ inwene.
3 Ililibi etim ìre umin inyi ene,
îre ogwu mbubut okichieek mkpa me lek ibaak.
4 Ogwu ugbek ikawopge uko me mgbọ iwop-uko,
me mgbọ irọkọ-uko,
môbubeek chieen̄ igak, ìkpomun̄ inorie.
5 Ata nteme ìkup kubọk mun̄ òdọdọk me ejit ene,
ire, ogwu òkaan̄ ngobo-ntet obokọt ichibi isibi.
6 Owuwa ebi ene ebe ema ìre ebi ata ejit;
ire, ìre ekene obokọt iweek ene ge
ògbegbe utoon̄-ejit imun̄?
7 Ogwu òkiluk ugwem kan̄
me ikarọge ìlọ ìre ogwu ata irọrọ,
uga ubelejit môkup inyi bọn kan̄
mgbọ chieen̄ kan̄ isinan̄a.
8 Ogwu ubọọn̄ isikweek me inyọn̄ ogboon̄ oyerebet,
ìkisa chieen̄ chieen̄
igop otutuuk ijo inu geelek isibi.
9 Ekene môkọt itumu ibe, “Nra igwọk ejit n̄a itana,
ǹtatana inan ijo me lek”?
10 Ijo ubọk itọ-inu mè ijo ubọk iroon̄-inu,
inu iba chi ìre mbuban inu me lek Okumugwem.
11 Ikerere gwun̄, ekisa irọrọ kan̄ iriọọn̄ ọmọ,
mè ìre inu îkirọ îtana mè ìre înen.
12 Utọn̄ òkinọ ikọ mè chieen̄ òkimọọn̄ inu,
îre Okumugwem orom ema iba cha.
13 Kama ilaak, inyi okakana ugbọọn̄,
top chieen̄, owu môrie inorie ijot owot mè isik.
14 Ewe ìkakinin̄ me chieen̄ ogwu òbolelep,
ire, isilep isa ije inan̄a, îra ikigugo lek ibe înwọn ọmọ.
15 Alata araran̄ mè ewuuk unye otu ewe rubi
ọmọ òwa ogbogbo,
ire, ogwu òkitumu ikọ òkaan̄ ifuk-ibot
ìre inu unye otu ewe ònanan enenen.
16 Bọkọ ofọnti ogwu òbọkọ
ogwu kperiọọn̄ isi me ata-ikọ tet kaan̄,
ire, tet ọmọ me lek kan̄ me nsọọn̄
ire ke îre nwa òsi ugan ke îbọkọ me ata-ikọ.
17 Inu ekaan̄be me ngan ìkitotop igo irerie,
ire, me òta kan̄,
ìkikup kubọk bọn ewuuk ojot ene akpa otu.
18 Ekisa nteme itọt otitọt,
mè ikisa ata mbia akọn̄ itim akọn̄.
19 Ogwu mbia ìkikpọk mbum ikọ nlelet;
kanin̄ unene melek ogwu ìkakichit otu.
20 Gwun̄ òfefieek otu inyi ogwu ute mè ogwu uga,
mêwut mkpukan̄ ugwem kan̄ iniin̄
me emen ekpuk udun.
21 Ìrot ebọkọbe me ejit ile me ibebene,
ìkabore ugbana me mgburudun̄.
22 Kabe, “Marọ ene useen̄ ijo inu îrọbe emi.”
Kup kpọ Okumugwem, ke mônyan̄a owu isibi.
23 Itọtọ inu ifeen̄ ene ìre mbuban inu me lek Okumugwem,
iroroon̄ inu ngan ngan inyi ene ìre ijo inu me lek kan̄.
24 Okumugwem okineen̄ ukot ije ogwu ebilene,
kpa ubọk ke ene obokọt iriọọn̄ oniin̄ ọmọ okije?
25 Isasa me uran-lek ichieek Awaji use,
mè iyaka inikibọnọ lek me mgburudun̄,
ìre ufe.
26 Ogwu ubọọn̄ òriọọn̄ inu ìkigop ebi ikpak isibi,
mè ochimi ema mun̄ osibi me lek.
27 Ekwukwu ene ìre mkpukan̄ Okumugwem,
ìkiwọlọ emen emen ejit ene
ikifuku nlelet inu geelek isibi.
28 Ata ejit mè igbegbe utoon̄-ejit,
ọmọ ore ikput-lek inyi ogwu ubọọn̄,
sa me ata ejit ke ogboon̄ kan̄ obokeke inye.
29 Umin nsabọn irieen̄ ìre unye ema ekaan̄be,
òrirọ ebi ugane ìre isọọn̄ ibot kiban̄.
30 Osusut òtap ene unan me lek,
ìkisan̄a ijo inu isibi me emen ene,
ikeya si ke njijan̄ okirọ me emen udọk udọk ejit ene.