Otutuuk nrom ìtọn̄ Awaji
148
Ìtọn̄ Okumugwem;enyi ebi ìkup me emen inyọn̄, ìtọn̄ Okumugwem;
ìtọn̄ ọmọ me ere òbebene ichit!
2 Enyi otutuuk ebi osat kan̄, ìtọn̄ ọmọ;
enyi otutuuk ikpele urum inu îrombe ito me akpabin inyọn̄,
ìtọn̄ ọmọ.
3 Enyi ebi kè ura mè onyan̄, ìtọn̄ ọmọ;
enyi otutuuk ebi kè ntoronyan̄ ìkinyi utoon̄, ìtọn̄ ọmọ.
4 Inu geelek òkup me emen inyọn̄ òbebene ichit, ìtọn̄ ọmọ;
enyi mun̄ òbebene isaba akpabin inyọn̄ si,
ìgọọk ìtọn̄ ọmọ.
5 Enyi otutuuk ìtọn̄ erieen̄ Okumugwem,
mije, îre sa me ida kan̄ înyibe ke îrom enyi isibi.
6 Ọmọ si osun̄ enyi kpa ogwu me irek kan̄ ire mgbọ geelek;
înyi enyi ikan kan̄ eyi môkupbe ire mgbọ geelek.
7 Enyi inu geelek òkup me linyọn̄, ìtọn̄ Okumugwem;
enyi ikpele anam ejit okwaan̄
mè ugwuuk okwaan̄ geelek;
8 ikeya si, omumen-inyọn̄ mè ibot mgbọlọ,
mè ibot awo mè oruk mè egwijo,
enyi ebi ìkirọ inu Okumugwem obe enyi erọ;
9 enyi ogoon̄ mè orioon̄ geelek,
uti òkito mfut mè echi ìkakito;
10 enyi otutuuk anam uwu mè anam oron,
mè inu geelek òkinyinyọnọ me ijọn̄,
mè unọn òwulu me inyọn̄;
11 enyi ebi ubọọn̄ linyọn̄, mè otutuuk ebilene,
ebi ilile, mè otutuuk ebi ìkikpulu linyọn̄;
12 enyi nsabọn irieen̄ mè nsabọn ibaan̄,
ugane mè gwun̄ aya;
enyi otutuuk, ìtọn̄ Okumugwem!
13 Enyi otutuuk, ìtọn̄ Okumugwem,
mije, erieen̄ kan̄ gaalek omin iraka otutuuk erieen̄;
òrirọ kan̄ obene isaba linyọn̄ mè akpabin inyọn̄.
14 Ọmọ înyi ebi ido kan̄ unye;
eya orọ otutuuk ebi kan̄, ebi Ijeren,
ebi ìre bọn ibot ejit kan̄ ekitọn̄ ọmọ.
Ìtọn̄ Okumugwem!