Itọtọn̄ Awaji Ogwu Òkaan̄ Unye Geelek
147
Ìtọn̄ Okumugwem!Îjaan̄ ibe ekọt okwa etọn̄ Awaji kiji;
îtop mè itat ibe etọn̄ ọmọ.
2 Okumugwem okinama Jeruselem;
ọmọ okisa bọn ebi Ijeren ebi ekpulube me akọn̄ ika.
3 Ọmọ okigwa ebi inyọn̄ ogakbe,
mè ikibọp unan kiban̄.
4 Ọmọ otumu ifieek otu ifuk ntoronyan̄,
mè inyi ema ge ge erieen̄ iso.
5 Okumugwem, Òkaan̄ kiji, îmin mè ikaan̄ unye enenen;
iriọọn̄-inu kan̄ kpebekọt itọ iriọọn̄ ikeke.
6 Okumugwem okibene ebi irek osikibe ifo inyọn̄,
mè ikida ebi òkpaka ibot itọbọ me ijọn̄.
7 Ìkọt okwa ìbe Okumugwem onirọ;
ìsa uneen̄ ìkọt utop okwa ìnyi Awaji kiji.
8 Ọmọ okisa oduku inyọn̄ iwele ichit isi akpabin inyọn̄;
ọmọ okiria ibot ibe irep igwook me ijọn̄;
ọmọ okirọ mbubet itibi me inyọn̄ ogoon̄.
9 Ọmọ okinyi ebi kè anam oron inorie kiban̄,
mè ikinyi si bọn ekerekwukwu,
mgbọ ema isito ito uraafiọọn̄.
10 Okumugwem ìkakaan̄ ulọk
me lek inyinya òkakaan̄ unye;
ìkadodo si ebi akọn̄ ìnyenye ejit.
11 Ire, inu îkitop ejit me lek ìre ebi ìkimin ọmọ;
ebi ikpọchieen̄ kiban̄ okupbe me lek
imumechieen̄ mgbọ geelek kan̄.
12 Enyi ebi Jeruselem, ìtọn̄ Okumugwem;
enyi ebi Sayọn, ìtọn̄ Awaji kinyi!
13 Ọmọ okiriọọn̄ ubọk ibem enyi;
ọmọ okigbana bọn enyi ekaan̄be.
14 Ọmọ otap utelelek ikana okike ijọn̄ kinyi;
ọmọ okinyi enyi atalek inorie
ònwọnwọn ichit ibe ijot enyi owot.
15 Ọmọ oria ikọ otu kan̄ inu linyọn̄;
ikọ kan̄ ososo ere mgbọ yaage.
16 Ọmọ okisa ibot awo iwele ichit ere
kubọk inwọọn̄ lek arọọn̄,
mè ogwọ senesene mun̄ ewuuk
ochon okana ere kubọk ntọn̄.
17 Ọmọ okitọọn̄ okpukpuk mun̄ igwook kubọk mgbọlọ;
kpunu ogwu òbokọt ibeme utọọk îkiria inu!
18 Ọmọ isinyi ida, okpukpuk mun̄ cha îra itọk ita;
ọmọ okiria efet kan̄ inu, mun̄ îra ibaak.
19 Ọmọ îtumu ikọ kan̄ inyi Jekọp,
mè ige ikan kan̄ mè unen oyerebet
kan̄ inyi ebi Ijeren, bọn kè Jekọp.
20 Ọmọ ìkarọ ikeyi ìnyi ebi ofifi ido geege;
ebi ofifi ido kperiọọn̄ si unen oyerebet kan̄.
Ìtọn̄ Okumugwem!