Okumugwem ìre ogwu ata ejit mè ogwu ejit nsan
Okwa itọn̄. Okwa kè Debit.
145
Awaji n̄a mè ogwu ubọọn̄ n̄a, mâtumu ibe owu mimin;mâtọn̄ erieen̄ kwun̄ ire mgbọ geelek, mgbọ geelek.
2 Usen geelek, mâkibe owu usọ,
mè ikitọn̄ erieen̄ kwun̄
ire mgbọ geelek, mgbọ geelek.
3 Okumugwem îmin enenen;
ikeya si, mêtọn̄ ọmọ ikpele ikpele ikpọ me lek;
umin kan̄ îraka inu ebekọt igobo itet.
4 Ebi ene mêkitọn̄ owu nan̄a me ukot re me ukot,
mè ikikpa ikpele ikwaan̄ kwun̄ osibe isibi.
5 Emi mâkikpa ibe owu okaan̄
ujamgbugbo eyi òsibi esese;
mâkitọp uyeke uyeke ikwaan̄ owu osibe cha ikana me ejit n̄a.
6 Ebi ene mêkpa ikwaan̄ unye kwun̄ osibe ikana;
emi mâkpa ikana ibe owu mimin.
7 Ebi ene mêtumu otutuuk nnwọn kwun̄ ikana,
mè isa me ida ònyenye
ikọt ata irọrọ kwun̄ me lek okwa.
8 Okumugwem ìre ogwu ata ejit mè ejit nsan;
îjot me imumechieen̄;
ìkakigwat lek ìnaan̄ ejit.
9 Okumugwem înwọn melek otutuuk ene;
nsan kan̄ si ìkirere lek
otutuuk inu geelek îrombe.
10 Okumugwem, otutuuk inu orombe môkitọn̄ owu;
otutuuk ebi eyi kwun̄ mêbe owu onirọ.
11 Ema mêkitumu ubọk mkpulu kwun̄
osabe ijaan̄ mè ikaan̄ umin;
ukpatu unye okaan̄be ìkpota.
12 Mêsa me ikeya irọ inyi bọn ebilene
eriọọn̄ ikpele ikwaan̄ owu osibe,
mè ubọk osabe ikikpulu me ujamgbugbo.
13 Owu ìre ubọọn̄ ire mgbọ ikakaan̄ge itata;
mkpulu kwun̄ ìbokukup ire otutuuk ukot geelek;
Okumugwem ìkekeke inye me lek otutuuk use kan̄ geelek,
înwọn me irọrọ kan̄ geelek.
14 Okumugwem îkibieen̄ ebi ìberọrọn̄ ikaan̄,
mè òkobene ebi ìnanan̄a irọn̄ ògwuun̄.
15 Okumugwem, inu geelek orombe
ìkikpọ owu chieen̄ me isi,
owu ora ikinyi ema inorie kiban̄ me ata mgbọ.
16 Owu òkichichili ubọk iche inu ikana,
mè ikiche uche òjot òjot inyi inu geelek òkaan̄ ugwem,
ubọk îweekbe.
17 Okumugwem ìre ogwu ata irọrọ me oniin̄ geelek;
ìkikakaan̄ ata ejit me lek inu geelek îrombe.
18 Okumugwem îkup mgbet itatap ubọk
inyi ebi geelek ìgwegwen ọmọ;
ebi geelek ìkigwen ọmọ me ijọn̄ ijọn̄ ejit kiban̄.
19 Môkinyi ebi geelek ìkitet ukpook kan̄ inu òkup ema me uyọt,
mè ikinọ si ida ito kiban̄,
mè ikinyan̄a ema.
20 Okumugwem ìkikput lek
ebi geelek ìmumun̄ ọmọ me chieen̄;
ire, môjijaka otutuuk ebi òkpaka ibot isan̄a.
21 Mâsa otu n̄a itumu ikọ itọn̄ Okumugwem;
otutuuk inu geelek òkifuuk efuuk
môtọn̄ erieen̄ kan̄ òkup mbuban
ire mgbọ geelek, mgbọ geelek.