Ogwu ubọọn̄ îtọn̄ Awaji ibe akọn̄ înwọn ọmọ
Okwa kè Debit.
144
Ìtọn̄ Okumugwem, ogwu òre ewuuk òkikput emi lek!Ọmọ ojeen̄ emi ukot akọn̄,
mè ineen̄ emi isun̄ inyi etim.
2 Ọmọ ore ogwu òkimun̄ emi me chieen̄,
mè ire si uwu mgban akọn̄ òkikput emi lek,
mè okwukwek akọn̄ òkilet emi lek,
mè agbọ òkikwek emi lek,
mè ogwu unyan̄a n̄a,
ogwu nkilibi inin̄ lek mgbọ uyọrọlek;
ọmọ okirọ ebi n̄a esiki ibot enyi emi.
3 Okumugwem, ìre ogwu ebilene ikike ìkup me lek keke ni,
eyi osabe ọmọ igwen inu?
Sà ìre keke ke gwun̄ ebilene ore,
eyi owu okikaan̄ nkeek ibak ọmọ?
4 Ugwem ogwu ebilene ìbet lek mgbọ efuuk ge, ìkajọn̄ọ;
usen ugwem kan̄ ìbet lek ogugo,
ìkinininiin̄ ichep mgbọ yaage.
5 Okumugwem, rama akpabin inyọn̄ bum,
mè nan̄a sibi ijọn̄ na;
chak ubọk me lek ogoon̄,
inyi ibumu oduku!
6 Ria omumen-inyọn̄ na,
inyi iyiyala ebi ochicha kwun̄;
sook oraan̄ kwun̄ tap,
inyi ema eliliin̄.
7 Kup me emen inyọn̄ nyana ubọk;
sik emi sibi me ejit irem,
mè nyan̄a emi sibi me ubọk ebi ofifi ido.
8 Ema ìre ebi ataak ebek,
kpekitumu atikọ,
ebi ìkikaak ubọk ofiaan̄ ijeen̄ inyọn̄.
9 Jei Awaji, mâkọt aya okwa inyi owu;
mâfit uneen̄ akọp olik isa ikọt okwa itọn̄ owu.
10 Îre owu orọ ebi ubọọn̄ Ijeren eketim ekpan̄ me akọn̄,
mè inyan̄a Debit gwun̄ ikwaan̄ kwun̄ isibi me otu oge mkpa.
11 Sik emi sibi,
mè nyan̄a emi me ubọk ebi ofifi ido,
ebi ataak ebek, ebi kpekitumu atikọ;
ema ekikaak ubọk ofiaan̄ ijeen̄ inyọn̄.
12 Mgbọ bọn ebirieen̄ kiji isinin̄ nsabọn irieen̄,
rọ inyi ema enye lek kubọk uti òmimin isoon̄ ikeke;
mè rọ bọn ebibaan̄ kiji si ejaan̄ kubọk atà ebabala
òkikup me lek uwu ebi ubọọn̄.
13 Rọ inyi mfut uko ijot uwu mfut uko kiji;
mè esese esese isi mfut ijojot ke gbak;
rọ si inyi arọọn̄ kiji imaan̄ bọn me obop me obop.
14 Rọ inyi eriembuuk kiji imumana owuwa owuwa,
owot ikasibi geege;
ichep geege ikakup;
rọ si inyi ukpo uyọrọlek
ikataan̄ me lek oniin̄ me emen ama kiji.
15 Uga ubelejit òwa inyi ebi geelek ama kiban̄ okupbe ikeya;
uga ubelejit òwa si
inyi ebi geelek Awaji kiban̄ orebe Okumugwem.