Uriaak ibebeek ntap-ubọk me mgbọ ufialek
Okwa kè Debit.
143
Jei Okumugwem, nọ uriaak n̄a;gban̄ utọn̄ me lek mbeek nkibeek owu!
Owu ìre ogwu ata irọrọ;
soso, fọọk emi otu,
ke owu ogbe ogwu etoon̄be ejit me lek.
2 Kasibi emi, gwun̄ ikwaan̄ kwun̄, oyerebet me ibot,
mije kpunu ene geege òkup me ugwem
òrere ogwu ata irọrọ me isi kwun̄.
3 Ogwu ochicha îgọọk emi isi ire òta,
mè isulu emi ikpukpuku me ijọn̄;
îtap emi me ere òdudun,
kubọk ebi ìkwakwaan̄ mgbọ òjọjọn̄ọ.
4 Ogugo îsibi ita emi me lek;
ukpook îtap emi mgbugba igak ejit.
5 Nsi ikeek ukot oka mgbọ cha,
mè iwọlọ emen otutuuk inu orọbe cha ikpọ,
mè igen ibot ikpọ otutuuk ubọk ikwaan̄ kwun̄ cha.
6 Eya orọ, nnyana ubọk n̄a inyi owu;
mweek owu enenen,
kubọk ijọn̄ òchachiaak oweek ibot.
7 Okumugwem, fọọk emi otu ugwat ugwat;
ogugo îta emi me lek;
kalet lek kwun̄ me lek n̄a,
inyi nkakup kubọk ogwu òkwukwu.
8 Jeen̄ emi imumechieen̄ mgbọ
geelek kwun̄ ewelegwe geelek,
mije, utoon̄-ejit n̄a ìkup me lek kwun̄;
jeen̄ emi oniin̄ mâjebe,
mije, owu ke nkitọbọ ebum inyi.
9 Okumugwem, san̄a emi me ubọk ebi ochicha n̄a,
mije, ubọk kwun̄ ke ntap ibot n̄a.
10 Jeen̄ emi ubọk mâkirọ inu oweekbe,
mije, owu ore Awaji n̄a;
me nsan kwun̄,
sa emi je me ere uyọrọlek kpoyakabe imun̄ emi.
11 Okumugwem, nyan̄a emi ebek ugwem mije erieen̄ kwun̄;
nyan̄a emi sibi me uyọrọlek,
mije, owu ìre ogwu ata irọrọ!
12 Kpan̄ ebi ochicha n̄a,
mije imumechieen̄ mgbọ geelek kwun̄
eyi okaan̄be me lek n̄a;
jijaka ebi ìkitutuku emi,
mije, emi ìre gwun̄ ikwaan̄ kwun̄!