Uriaak ikput-lek
Okwa kè Debit.
141
Okumugwem, owu ke nkigwen;na ugwat ugwat na tap ubọk nyi emi;
soso, gban̄ emi utọn̄ mgbọ nkigwen owu.
2 Bọkọ uriaak n̄a kubọk okibọkọ
utop olu nsensi ewọpbe inyi owu;
bọkọ si ubọk mbenebe ikiriaak owu
ike okibọkọ ngwugwa ikakwun̄.
3 Okumugwem, kibem emi otu alọm,
mè kachieek ibe ukpọk-otu n̄a itumu ijo usem.
4 Da ejit n̄a san̄a me lek ijo inu,
mè igọgọọk ebi ijo ife ikup ikirọ ijo inu;
kachieek ibe inorie ijo ijọk kiban̄ cha ire emi otu.
5 Mma ibe ogwu ata ene ikan̄ inu inyi emi,
eya ìborọ emi ata inu;
ire isulu emi osusut,
ìbokup kubọk ìsa aran̄ iteek emi lek;
kachieek ibe ǹjit.
Ire, ǹkadodo umin ogwu ijo ene mônyibe emi,
mije, mgbọ geelek, ǹkirariaak
uriaak ikeme ijo irọrọ kiban̄.
6 Isisan̄a ebi ibot kiban̄ me irek ilile ema ekupbe,
mgbọ ya, ema mêtolek inichieek ibe
ke ikọ n̄a ìre atikọ.
7 Ubọk ogwu uko okirọkọ ijọn̄
mè ikirọkọ ewuuk isibi itọọn̄ igwook,
ikeya ke etọọn̄ ukwuuk kiji ikana otu udọn̄-ufuun̄.
8 Ire, owu Okumugwem Awaji ke nkikpọ chieen̄ me isi;
emen kwun̄ ke nlet lek n̄a;
kachieek ibe okwukwek kwun̄ itele emi mgbọ geege.
9 Kachieek ibe ufe ema etapbe ikikpọ emi itet emi;
kachieek si ibe emi ǹrọn̄
me njin ebi ijo irọrọ cha etapbe.
10 Tele ufe ebi òkpaka ibot etapbe ikpulu itet ema gaalek;
ire, tele emi ǹje awọ awọ ǹraka.