Uriaak ibebeek Awaji mbem
Ìkup inyi ogwu òjeen̄ okwa. Okwa kè Debit.
140
Okumugwem, nyan̄a emi sibi me ubọk ebi ikpak,mè sa lek kwun̄ kwek emi me ubọk ebi afa.
2 Otitọt irọrọ ijo inu ìkakinan̄a ema me ejit mgbọ geege;
mgbọ geelek, ema ekineneen̄ lek ititiin̄ ibe akọn̄ ibumu.
3 Otu alọm kiban̄ ìreke kubọk ejeek ijijinu,
ikọ ònan̄a ema me otu ìkikpan̄ ene kubọk iwot asawọ.
4 Okumugwem, bem emi me ubọk ebi ikpak;
sa lek kwun̄ kwek emi me ubọk ebi afa;
ebi ìbeben me ejit ikpukpulu emi ukot isan̄a me ijọn̄.
5 Ebi ugumulek mîtip ufe ikikpọ emi,
mè igwuk njin olik igbọ ikwek emi,
mè itaak ufe ichit otu oniin̄ isasa itet emi.
6 Emi ntutumu inyi Okumugwem ibe,
“Owu ore Awaji n̄a.”
Soso nọ ida mbeek n̄a.
7 Jei Okumugwem, Ogwukaan̄ n̄a,
ogwu unye òkitim etim ibot n̄a;
owu ore agbọ òkput emi lek me usen akọn̄ orọn̄be.
8 Okumugwem, inu ebi òkpaka ibot cha ekiweek,
kachieek ibe ire ema ubọk;
ijo otitọt kiban̄ cha, kachieek ibe irọ iso,
inyi ema ekagugo lek.
9 Uyọrọlek cha ebi ìkpakpa ikana emi
ekisa otu kiban̄ igween̄ inyi emi,
yaka kwaan̄ ema me ibot.
10 Tele akaak ukan̄ oren̄ebe me lek igwook ema me lek;
tele etọọn̄ ema etap me emen ukan̄
mè emen udọn̄ òdọdọk,
mè ema ebia,
mè ekakọt ìsibi.
11 Kachieek ibe ebi ìkitoon̄ ene uraamọn
ekaan̄ nje-nnyi-isi me linyọn̄;
tele ogbogbo uyọrọlek iweek ebi afa imun̄,
mè itọp ema ikaak.
12 Okumugwem, nriọọn̄ ibe
owu okisibi oyerebet inwọn ebi ekifeen̄,
mè ikinyi ebi ugbọọn̄ unen kiban̄.
13 Me atikọ, ebi ata irọrọ mêtọn̄ owu;
ebi kpunu ofiaan̄ me emen mêluk me isi kwun̄.