Awaji îriọọn̄ otutuuk ene mè ikikpọ ema chieen̄ me lek
Ìkup inyi ogwu òjeen̄ okwa. Okwa kè Debit.
139
Okumugwem, owu owọlọ emen n̄a ikpọ,mè iriọọn̄ ene nrebe.
2 Inu geelek nkirọ, owu oriọọn̄ isan̄a kpai;
ekiket n̄a geelek,
owu okup me emen inyọn̄ ere òjọjọn̄ọ ere iriọọn̄.
3 Ere geelek njebe inin̄,
mè ìyaka ire ǹkilalaak,
owu omun̄ emi;
owu oriọọn̄ otutuuk inu geelek nkirọ.
4 Sabum ikọ ge ònosibi emi me otu alọm,
owu Okumugwem, ora irọriọọn̄ inu mbatumu.
5 Owu òkakana emi okokop, me isi mè udun̄,
mè isa ubọk kwun̄ iwele ichit emi.
6 Irọriọọn̄ oriọọn̄be emi ikeyi îkaan̄ ukpook enenen;
îbene iraka iman̄,
emi m̀kpakọt itut.
7 Ere owa ke mâje inin̄, eyi mâlọbe owu chieen̄?
Sà ìre ere owa ke mâlibi inin̄,
eyi mâkwalabe inan̄a me isi kwun̄?
8 Ìrere m̀wuwulu inene ifo emen inyọn̄,
owu me ere ya okupbe;
ikerere ǹyaka ìgegele isiki ifo ama ekwukwu,
owu si me ere keya okupbe!
9 Ire mwulu abayaage ichep me agan̄ mbum-ura,
mè ìre ǹsi iluk me okputut
okwaan̄ ile agan̄ ichep-ura,
10 îre owu si obosa emi iban me ere ya;
owu si obotap ubọk inyi emi me ere ya.
11 Ire mbe ke udun môkana ichit emi bùk,
ke utoon̄ môkana eririeen̄ ikat ikana emi lek.
12 Me atikọ, udun ìkakidun me lek kwun̄;
eririeen̄ ìkitoon̄ kubọk egwe ikarek;
udun mè utoon̄ ìre ìkike me lek kwun̄.
13 Owu orom nriro òkup emi me lek,
mè isusọkọ emi ichim igba me emen owot nga n̄a.
14 Ǹkitọn̄ owu,
mije, owu òrom emi me oniin̄ òkaan̄ ukpook
mè ikup uyeke uyeke;
otutuuk ubọk ikwaan̄ kwun̄ ìkup si nke nke;
eyi ìre inu emi nriọọn̄be ijaan̄ lek.
15 Ukwuuk n̄a ìkalet owu me chieen̄,
mgbọ îbenebe ikitibi me emen owot nga n̄a,
mè ikiriọọn̄ ubọk igba isọk me nlelet.
16 Owu omun̄ emi me emen nkwa;
me emen ikpa kwun̄,
mîge otu ifuk usen n̄a me linyọn̄ isan̄a,
sabum ge me lek usen cha onibebene.
17 Jei Awaji, îyọt enenen emi ikọkọt igobo ekiket kwun̄ itet;
ìkarere inu mbakọkọt ifuk otu ifuk.
18 Ire mbafufuk, m̀kpakọt,
mije, môwa igak nkwukwuuk okpoon̄
òkup me agba awaji;
otutuuk usen ugwem n̄a ìkasoso ikekisa ifuk.
19 Jei Awaji, îlọk emi ibe ke kè owu òkpan̄ ebi ikpak;
enyi ebi ìkifiat eje ene, ìda ìbọkọ ìjọn̄ọ ere me lek n̄a.
20 Ebi ikpak ekisa ejit ikpak itumu ikọ ifiat owu,
mè ikitumu ijo usem ibak erieen̄ kwun̄.
21 Okumugwem, ǹchacha ebi ìchacha owu igo;
njọ ejit me lek ebi ìkifieek lek isan̄a me lek kwun̄.
22 Ncha ema isan̄a kubọk olu ifin;
m̀mọnọ ema ibe ìre ebi ochicha n̄a.
23 Jei Awaji, wọlọ emi kpọ, inyi òriọọn̄ ejit n̄a;
roon̄ emi kpọ si, inyi òmun̄ ekiket n̄a.
24 Kpọ-nu, mè ìre îkaan̄ inu ikpak nrọbe,
mè sa emi je me ata oniin̄ kwun̄,
eyi ojeen̄be ebi nte kiji ukot ikaan̄.