Okwa itọn̄
Okwa kè Debit.
138
Okumugwem, mâsa otutuuk ejit n̄a inyi owu itọn̄;mâkọt okwa itọn̄ owu me isi ebi kè awaji geelek.
2 Mâyaka isi ijeen̄ Uwu Mbuban kwun̄
itọbọ ebum inyi owu,
mè itọn̄ owu,
mije atikọ kwun̄ mè imumechieen̄ kwun̄
òkup mgbọ geelek;
melek si, mije, ikọ otu kwun̄ îmin owu me lek
igak itataan̄ etip owu okitaan̄.
3 Usen ntaan̄be ukpo igwen owu,
owu obọkọ emi otu,
mè itap emi unye me emen,
mè itọn̄ọ emi isi.
4 Okumugwem, otutuuk ebi ubọọn̄ me linyọn̄ mêtọn̄ owu,
mije, ema mînọ ikọ otu kwun̄.
5 Ema si mêkọt inu owu,
Okumugwem, orọbe me lek okwa,
mije, ujamgbugbo kwun̄ îmin enenen.
6 Okumugwem, ubọk geelek
owu orebe ogwu òbebene enenen,
owu òkakpọ ebi irek kiban̄ osikibe ìlọ chieen̄;
ire me lek ebi ugumulek,
òkikukup me ujọn̄ọ ere iriọọn̄ ema isi.
7 Ubọk geelek uyọrọlek okanabe emi okokop,
owu òkakichieek ibe isak emi ibot;
owu òkisasa unye ubọk kwun̄ inyan̄a emi isibi
me ubọk ebi ochicha n̄a,
ebi ìkikaan̄ ikpele unaan̄-ejit me lek n̄a.
8 Okumugwem, owu môrọ inu geelek ògbaan̄ emi me lek
iso kwok kwok;
imumechieen̄ kwun̄ ìkikukup ire mgbọ geelek;
soso, kajuuk ikwaan̄ kwun̄ ìtele me mgbidim;
sa si re òta.