Ito ebi Ijeren etobe me Babilọn
137
Me agba okwaan̄ ido Babilọn,ke eji esiki ikweek, mè idimi ito,
mgbọ eji ekeekbe ubọk ejijakabe Sayọn.
2 Eji eyayaka uneen̄ kiji ijeen̄
me lek uti wilo òkup me ere cha,
kpeyaka ifit;
3 mije, ere ya ke ebi ìkpulu eji me akọn̄ ekido eji okwa;
ebi ìkitutuku eji ebe eji ekọt okwa ebele ejit,
mè ikibe eji,
“Ìkọt-nu okwa ge me lek okwa cha
enyi ekikọt me Sayọn ìnyi eji egban̄!”
4 Ìre eji ebejeje iben okwa Okumugwem
inikọt me ido ebi ichen
ebi ekariọọn̄ge Awaji?
5 Jei Jeruselem, ire emi mwuuk owu,
ubọk ulom n̄a ikwu,
inyi nkasa ìfit uneen̄.
6 Ire ǹkayaka ìkeek owu Jeruselem,
mè ire ìkare owu ke nkinwọọn̄
igak inu geelek òkineme emi,
alọm igba igọm emi me otu,
inyi nkakọt ìsa ìkọt okwa!
7 Okumugwem, kawuuk inu ebi Edọm erọbe
me usen akọn̄ oriebe Jeruselem;
kawuuk ubọk ema etetbe lek inye ikibe,
“Ìgwagwak ama ya, ìgwak ìre lek ọdọ me irak ijọn̄!”
8 Babilọn, owu ama ebekpukpuku igwook;
uga ubelejit òwa inyi ene ya
ogwu môrọbe owu useen̄ inu owu orọbe eji!
9 Uga ubelejit òwa inyi ene ya
ogwu môkpulube asa nsabọn kwun̄
isulu ikpọk isan me lek ewuuk!