Uriaak ikeme ebi ochicha
Okwa ekikọt isa inene isi Uwu Mbuban.
129
Ebi Ijeren, ìtumu ìbe,“Akarake ido kiji obenebe,
ebi ochicha mîsisaak eji ijo ijo.”
2 “Akarake ido kiji obenebe,
ebi ochicha kiji mîsisaak eji ijo ijo;
ire, ema kpekọt ijijaka ido kiji.
3 Ema mîbak eji udun̄ igwook,
kubọk ebi uko ebak ijọn̄ ujọn̄ọ ujọn̄ọ ibewop inu.
4 Ire, Okumugwem ìre ogwu ata irọrọ;
îsọp olik ebi òkpaka ibot esabe itobo eji ikam.”
5 Kè esip itet ebi geelek ìchacha Sayọn;
kè ema eliliin̄ me akọn̄.
6 Kè ema ekana ekup
kubọk mbubet òtibi me inyọn̄ otoon̄-uwu,
echi òkichiaak isan̄a sabum mônititibi;
7 echi ìkakup me lek inu geege ìnyi ebi ìsọsọp,
ìkakukup si me lek inu geege ìnyi ebi ìtititiin̄.
8 Ebi ije iraka ema, ekagbana ema ìbe,
“Kè Okumugwem igbana enyi;
eji mîgbana enyi me erieen̄ Okumugwem!”