Awaji eyi òre Awaji
115
Jei Okumugwem, erieen̄ kwun̄ gaalekke otutuuk itọn̄ okup inyi;
ìkare eji, in̄-in̄, ìkare eji kubọk ge;
owu gaalek ke itọn̄ okup inyi,
mije, owu okimun̄ ene me chieen̄ mgbọ geelek,
mè igbe ogwu etoon̄be ejit me lek.
2 Ebi ofifi ido ebejeje ikido eji otu ibe,
“Mgbọ, Awaji kiban̄ ya ìkup me owa?”
3 Awaji kiji ìkup me emen inyọn̄;
inu òneme ọmọ ke îkirọ.
4 Eyi kiban̄, mkpọmfaka kiban̄
ìre alata okuket mè alata araran̄;
ebilene ikike esa ubọk irom.
5 Mkpọmfaka chi mîkaan̄ otu, ire, kpekikọt itumu ikọ;
mîkaan̄ chieen̄, ire, kpekikọt imọọn̄ inu.
6 Mîkaan̄ utọn̄, ire, kpekikọt inọ ikọ;
mîkaan̄ inwọm, ire, kpekikọt inọ olu inu.
7 Ema mîkaan̄ ubọk, ire, kpekikọt isa itet inu geege;
mîkaan̄ ukot, ire, kpekikọt isa ije ije;
emen ebek kiban̄ si ìkakisan̄a amọn kubọk ge.
8 Ebi ìkirom mkpọmfaka chi ebet lek mkpọmfaka kiban̄;
ikeya si, ebi ìtoon̄ ejit me lek mkpọmfaka chi
ebet lek mkpọmfaka chi si.
9 Ire, enyi ebi Ijeren, ìtoon̄ ejit me lek Okumugwem;
ọmọ ore ogwu òkitap ubọk inyi enyi,
mè ire si agbọ òkikput enyi lek.
10 Enyi ebi uwu kè Erọn, ebi ngwugwa,
ìtoon̄ ejit me lek Okumugwem;
ọmọ ore ogwu òkitap ubọk inyi enyi,
mè ire si agbọ òkikput enyi lek.
11 Enyi ebi ìkimin Okumugwem,
ìtoon̄ ejit me lek Okumugwem;
ọmọ ore ogwu òkitap ubọk inyi enyi,
mè ire si agbọ òkikput enyi lek.
12 Okumugwem ìkakiwuuk eji;
ìkpolọlọ igbagbana eji;
môgbana otoko ebi Ijeren,
mè igbana si ebi uwu kè Erọn.
13 Okumugwem môgbana ebi geelek ìkimin ọmọ,
ebi ilile mè ebi sọntiik.
14 Kè Okumugwem irọ inyi enyi emumana;
enyi melek bọn kinyi.
15 Kè Okumugwem ogwu òrom inyọn̄ mè ijọn̄
igbana enyi.
16 Emen inyọn̄ ìkup inyi ọmọ Okumugwem,
ire, linyọn̄ ke îsa inyi bọn ebilene.
17 Ebi ìkwukwu kpekitọn̄ Okumugwem;
itọtọn̄ Okumugwem ìkakup
ìnyi ebi ìfofo ama ekwukwu,
ere kpekisan̄a amọn.
18 Ire, eji ebi ìkup me ògat ugwem mêtọn̄ Okumugwem,
bene me mgbọ keyi ire mgbọ ikakaan̄ge itata.
Ìtọn̄ Okumugwem!