Okwa isasa ikeek mgbọ esibibe me Ijipiti
114
Mgbọ ebi Ijeren enan̄abe me Ijipiti isibi;mgbọ ema, bọn kè Jekọp, enan̄abe
me etete ebi ìkitumu ofifi usem isibi,
2 Awaji ìsa ijọn̄ Juda irọ ere mbuban kan̄;
ido Ijeren okakana ido ọmọ okikpulu.
3 Okwaan̄ Anyiaan̄ omumun̄ Awaji okinu,
mè ichiaak ita;
Okwaan̄ Jodan ogwugwu ikom ita irak.
4 Ogoon̄ ofefieek owot,
mè iwulu iyat kwèrèm kwèrèm kubọk bọn ebot;
orioon̄ okekirama ikana soop soop kubọk bọn arọọn̄.
5 Buboo! Okwaan̄ Anyiaan̄, keke orọ ochiaakbe ita?
Buboo! Okwaan̄ Jodan, òjeje igwu ikom ita irak?
6 Owu ogoon̄, òjeje ifieek owot,
mè ikiwulu kubọk bọn ebot?
Sà orioon̄, owu òjeje ikiraan̄ kubọk bọn arọọn̄?
7 Jei linyọn̄, sisik
mgbọ owu môkanabe chieen̄
itoon̄ me lek Okumugwem;
mgbọ owu mômun̄be Awaji kè Jekọp.
8 Îre ọmọ onwene ewuuk ikana èdọ mun̄,
mè inwene ewuuk ònyenye ikana ogbuuruk mudim.