Tọn̄ Awaji me nnwọn kan̄
113
Ìtọn̄ Okumugwem;enyi bọn ikwaan̄ Okumugwem, ìtọn̄ ọmọ;
ìtọn̄ erieen̄ Okumugwem!
2 Kè ebilene etọn̄ erieen̄ Okumugwem,
bene me mgbọ keyi re mgbọ ikakaan̄ge itata!
3 Bene me agan̄ mbum-ura si re agan̄ ichep-ura,
erieen̄ Okumugwem ìre inu ebekitọtọn̄.
4 Okumugwem îbene isaba iraka ibot ebi ido geelek;
ujamgbugbo kan̄ îbene si isaba iraka akpabin inyọn̄.
5 Ìre ekene obet lek Okumugwem Awaji kiji,
ogwu òkup me inyọn̄ ogboon̄ ubọọn̄ me emen inyọn̄?
6 Ìre ekene obet lek Okumugwem
ogwu òkup me emen inyọn̄
ikigele chieen̄ isiki ikpọ inu òkup me akpabin inyọn̄,
mè echi òkup me linyọn̄?
7 Ọmọ okibene ebi ugbọọn̄ isibi me ntọn̄,
mè ikibene ebi una isan̄a me inyọn̄ otiton,
8 mè osa ema òto me agba lek ebi ilile,
inyi ekweek irek melek ebi ilile me etete ebi eyi kan̄.
9 Ọmọ okinyi enenwaan̄ òra bọn,
mè orọ inyi iluk uwu me ubelejit,
mè ikana uga òkaan̄ bọn.
Ìtọn̄ Okumugwem!