Unwọọn̄ ogwu ata ene
112
Ìtọn̄ Okumugwem!Kpọ-nu uga ubelejit òkup inyi ene ya
ogwu òkitet ukpook me lek Okumugwem;
ogwu irọrọ ikọ Okumugwem otọbe okitop me lek.
2 Bọn ene ya mêre ebi isi ile ìkakaan̄ otu me ama;
Awaji môgbana owot iman kan̄.
3 Ebi ototun̄ ukan̄ kan̄ mênin̄ ubọọn̄,
mè ikaan̄ inu ubọọn̄;
ata irọrọ kan̄ ìkabota ire mgbọ geelek.
4 Utoon̄ môtoon̄ me emen udun
inyi ogwu òkirọ inu òtatat;
ogwu ata irọrọ òkakaan̄ ejit nsan mè ata ejit.
5 Inu môje ijaan̄ me lek ogwu òkichili ubọk,
mè ikifọọk ikpoko inyi ene,
mè ikirọ mbubek kan̄ me oniin̄ ònenen.
6 Kpunu inu òbosisik ogwu ata ene;
ebi ene kpebewuuk si ọmọ ire mgbọ geelek.
7 Ìkabofieek owot me lek ijo etip;
ejit kan̄ ìkposisik kubọk ge,
mije, ọmọ ìtoon̄ ejit me lek Okumugwem.
8 Ejit kan̄ ìnyenye;
ìkabofieek owot
mege mômun̄be ubọk Awaji
osulube ebi ochicha kan̄ osusut.
9 Îchili ubọk iche inu inyi ebi ugbọọn̄;
ata irọrọ kan̄ ìkabota ire mgbọ geelek;
ọmọ môkaan̄ unye,
mè ikaan̄ ulibi.
10 Ebi ijo ife isimun̄ ikeya,
ejit kiban̄ îra ifiat isan̄a;
ema mîra ikaan̄ njijọ ejit;
ire, mije nkeek kiban̄ ikarọge ìso,
lek kiban̄ îra iwọ;
ema mîra ikpọk ubọk iyat.