Ogwu ònwọnọ mkpa itọn̄ Awaji
116
Emi mmun̄ Okumugwem me chieen̄,mije, înọ emi ida,
mè inọ ida mbeek n̄a.
2 Mije, îkwuun̄ utọn̄ igban̄ emi ida;
eya orọ, ọmọ ke mbakigwen
usen geelek me ugwem n̄a.
3 Mgbọ ufe mkpa okanabe emi me ijọn̄ okokop;
ukpook udọn̄-ufuun̄ otetet emi;
owot n̄a îfieek;
ibot ejit n̄a owuwulu.
4 Ntataan̄ ukpo ibọn̄ọ erieen̄ Okumugwem ibe,
“Jei Okumugwem, soso, nriaak owu,
nyan̄a ebek ugwem n̄a!”
5 Okumugwem ìre ogwu òkirọ nnwọn,
mè ire si ogwu ata irọrọ;
iin̄, Awaji kiji ìre ogwu ejit nsan.
6 Okumugwem okibem ebi kpekọt inyan̄a lek kiban̄;
mgbọ nkakaan̄ge ogwu ntap-ubọk, ọmọ onyan̄a emi.
7 Ibot ejit n̄a, siki kweek tap efuuk,
ke Okumugwem îrọ inu ijaan̄ me lek n̄a.
8 Îrọ inyi ǹnwọnọ mkpa,
mè ituku emi mun̄ ito me chieen̄,
mè irọ inyi nkakwaak ìrọn̄.
9 Eya orọ, mâsiki ibot inyi
Okumugwem me linyọn̄ keyi,
ere ebi ìkup me ògat ugwem ekiluk.
10 Ichechieek n̄a ìkekeke inye,
ikerere mgbọ ntumube ibe
ke ufialek mônikeme emi ikpan̄.
11 Ikerere si mgbọ nsabe
me ufieek-owot itumu si ibe ke
kpunu ebilene geege ebetoon̄ ejit me lek.
12 Ìre keke ke mbasa inyi Okumugwem
me lek otutuuk ata inu kan̄ îrọbe inyi emi?
13 Mâgwook miin̄ inyi Okumugwem,
mè itọn̄ ọmọ, mije înyan̄abe emi.
14 Me ere otutuuk ebi eyi Okumugwem etitiin̄be,
ere ya ke mbanyi Okumugwem
inu nchieekbe ọmọ use.
15 Mkpa ebi eyi Okumugwem
ìre inu unye otu ewe me lek Okumugwem.
16 Okumugwem, me atikọ, emi ìre gwun̄ ikwaan̄ kwun̄;
iin̄, ǹkisi ikwaan̄ inyi owu
kubọk nga n̄a osibe inyi owu;
owu otọn̄ọ emi mkpọn isan̄a me ukot.
17 Okumugwem, mâgwa ngwugwa isa inyi owu itọn̄,
mè ikigwen erieen̄ kwun̄ me uriaak n̄a.
18 Me ere otutuuk ebi eyi Okumugwem etitiin̄be,
ere ya ke mbanyi Okumugwem inu nchieekbe ọmọ use.
19 Mârọ use n̄a iso me emen Uwu Mbuban Okumugwem,
ere ntook kan̄ okupbe, me Jeruselem.
Ìtọn̄ Okumugwem!