Ufieejit kè Juda
Ijeen̄-inu kè Etan ogwu Ejira.
89
Mege isi ire mgbọ ikakaan̄ge itata,mâkọt okwa ofolek
imumechieen̄ Okumugwem
okikaan̄ me lek ene mgbọ geelek;
nan̄a me ukot re me ukot,
mâsa otu n̄a ikpa ibe
ke owu ogbe ogwu etoon̄be ejit me lek.
2 Nriọọn̄ ibe ke imumechieen̄ kwun̄
ìbokukup ire mgbọ geelek;
ikeya si, igbegbe utoon̄-ejit ogbebe
ìkekeke ikam kubọk akpabin inyọn̄.
3 Owu otumu ibe, “Emi nra inyan̄a ibot melek Debit,
ogwu ngobobe;
nra ichieek ọmọ, gwun̄ ikwaan̄ n̄a, use ibe:
4 ‘Mârọ ibe ebi owot iman kwun̄ ekere ubọọn̄ mgbọ geelek;
mâyaka ogboon̄ ubọọn̄ itap me uwu kwun̄
ire ukot geelek.’ ”
5 Okumugwem,
akpabin inyọn̄ môkitọn̄ uyeke inu owu okirọ;
ebi osat me emen inyọn̄
mêkitumu me ntitiin̄ kiban̄ ibe
ke owu ogbe utoon̄-ejit.
6 Ìre ekene me isinyọn̄ ke ebesa itọ me lek kwun̄,
Okumugwem?
Sà ìre ekene me etete ebi osat ore ìkike melek kwun̄?
7 Ema ekitetet ukpook kwun̄ me emen ntitiin̄ kiban̄;
otutuuk kiban̄ ìkana owu okokop
ekifefieek owot me lek kwun̄,
mè ikiran mije ukpook kwun̄.
8 Jei Okumugwem Awaji Ogwukaan̄ Inyọn̄ mè Ijọn̄,
kpunu ogwu òbet lek kwun̄;
Okumugwem, owu okaan̄ unye;
me agan̄ geelek, owu ogbe ogwu etoon̄be ejit me lek.
9 Owu okikpulu emen awaji ere ekoon̄ okiriak ifuuk;
ogbururu isinin̄ okwaan̄, owu okirọ inyi iyaka isibi.
10 Owu okpan̄ Rayabu, mgbugbo anam ejit okwaan̄,
mè ijak ọmọ ikpukpuku;
owu osa ikpele unye kwun̄
ililaba ebi ochicha kwun̄ ichieen̄ ita.
11 Akpabin inyọn̄ ìre eyi kwun̄;
ijọn̄ si ìre eyi kwun̄;
linyọn̄ mè inu geelek òkup me emen kan̄, îre owu orom.
12 Owu orom agan̄ inyọn̄ mè agan̄ osiki;
ogoon̄ Tabọ mè ogoon̄ Emọn
ekeke kubọk ebi ejit obelebe
ikitọn̄ owu.
13 Owu okaan̄ ikpele unye;
unye kwun̄ îmin enenen;
ubọk ulom kwun̄ îtim ikpan̄ me akọn̄.
14 Ata irọrọ mè unen oyerebet
ore inu osabe itọbọ ọdọ mkpulu kwun̄;
inu geelek okirọ, ìkijeen̄ ibe ke owu omun̄ ene me chieen̄,
mè igbe ogwu etoon̄be ejit me lek.
15 Ikpele ubelejit òwa inyi
ebi ìkigọọk ikọt okwa unwọọn̄ isa itọn̄ owu;
Okumugwem, isi kwun̄ môtoon̄ me lek kiban̄.
16 Mije kwun̄, ema ekinwọọn̄ unwọọn̄ otutuuk usen,
mè ikitọn̄ owu enenen me ata irọrọ kwun̄.
17 Ikpele unye kwun̄
ke eji ekisa itim ikpan̄ ebi ochicha kiji;
sa me nnwọn kwun̄ ke okinyi eji ikpele unye ya.
18 Okumugwem, owu ore agbọ inyi eji;
owu ogwu Òkup Mbuban, ogwu ebi Ijeren ekiriaak,
owu ore ogwu ubọọn̄ kiji.
19 Me emen ilaak ọkpọchieen̄,
owu otumu inyi ebi ìchieek me lek kwun̄ ibe:
“Ntap ubọk inyi ogwu akọn̄ ge;
mmọnọ ene ge me etete ebi n̄a isa ito ubọọn̄.
20 Ngobo Debit gwun̄ ikwaan̄ n̄a isibi;
ntọkọ ọmọ aran̄ n̄a me ibot,
mè ito ọmọ ubọọn̄.
21 Mâsa unye n̄a irọ ọmọ inye,
mè irọ ọmọ ikaan̄ unye.
22 Ebi ochicha kan̄ kpebekọt ifeen̄ ọmọ;
ebi ugumulek si kpebekọt itim ikpan̄ ọmọ.
23 Me isi kan̄, mâjak ebi ochicha kan̄ ikpukpuku iriọk,
mè ikpan̄ ebi geelek ìchacha ọmọ.
24 Mâma ọmọ,
mè ikeke inye me lek kan̄;
mârọ ọmọ ikaan̄ unye enenen, mije umin erieen̄ n̄a.
25 Mârọ ama ubọọn̄ kan̄ imin owot;
môbene me okwaan̄ ile Mediterenia
isaak isi ire okwaan̄ Yuferetis.
26 Ọmọ môtumu inyi emi ibe,
‘Owu ore Nte n̄a mè Awaji n̄a;
owu ore ewuuk òkinyan̄a emi.’
27 Emi mâsa ọmọ irọ adasi gwun̄ enerieen̄ n̄a,
mè irọ ọmọ ogwu ubọọn̄
òmimin igak otutuuk ebi ubọọn̄ me linyọn̄.
28 Imumechieen̄ n̄a môkup me lek kan̄ ire mgbọ geelek;
ikeya ke inyan̄a-ibot n̄a melek kan̄ obokup.
29 Onineen̄ ubọọn̄ kan̄ môkeke ibia kubọk akpabin inyọn̄;
ebi owot iman kan̄ mêkikpulu me ntuun̄ me ntuun̄
ire mgbọ geelek.
30 “Ire, ire bọn owot iman kan̄ ifiat ikan n̄a,
mè ikpaka ikọ n̄a,
31 ire ema ijit orọmijọn̄ n̄a,
mè ije ikeme ikọ ntọbe,
32 mâsa olik ekpuk ibak ema udun̄, mije ijo inu kiban̄,
mè isa edim ikpaan̄ ibala ema lek mije nrọ-nlọ kiban̄.
33 Ire, eya ìkabokput emi imama Debit ire mgbọ geelek;
ìkabokwek emi irọrọ use nchieekbe ọmọ.
34 M̀kpafaan̄ inyan̄a-ibot n̄a melek kan̄;
ǹkabanwene ikọ otu n̄a mgbọ geege.
35 Nsa me erieen̄ n̄a òkup mbuban ichieek Debit use;
ǹkabafiaan̄ Debit ofiaan̄ mgbọ geege.
36 Onineen̄ ubọọn̄ kan̄ môkeke ibia;
me isi n̄a, ogboon̄ ubọọn̄ kan̄ môkup ire mgbọ geelek,
kubọk ura òkup me isinyọn̄.
37 Ike onyan̄ obiabe ikam me akpabin inyọn̄
kubọk inu ijejeen̄ ògbegbe ibe etoon̄ ejit me lek,
ikeya si ke ogboon̄ ubọọn̄ kan̄ obobia
ire mgbọ ikakaan̄ge itata.”
38 Ire, owu onaan̄ ejit ikeme ogwu ubọọn̄ owu ogobobe,
mè ikpọ chieen̄ ilọ me lek kan̄,
mè ijit ọmọ.
39 Owu onyan̄a ibot ifaan̄ me lek gwun̄ ikwaan̄ kwun̄,
mè isan̄a ọmọ okpibot ubọọn̄ me ibot itọp ito me ntọn̄.
40 Owu ogwak ogọ òkakana ama kan̄ igwook,
mè igbugbọ si mgban akọn̄ ama ya ito.
41 Otutuuk ebi ìkije iraka, ekigwaka igba ifum inu kan̄;
ebi ama ìluluk ikana ọmọ enikisa ọmọ irọ ochak.
42 Owu orọ ibe ubọk ebi ochicha inye igak eyi kan̄,
mè irọ ema otutuuk enwọọn̄ unwọọn̄.
43 Owu orọ ibe oge akọn̄ kan̄ ikput,
mè isa akọn̄ ifieek ọmọ.
44 Owu obọkọ okuba isan̄a ọmọ me ubọk,
mè ida ogboon̄ ubọọn̄ kan̄ itọbọ me ijọn̄.
45 Owu okpan̄ ọmọ me nsek,
mè itap ọmọ esip ijot isi.
46 Jei Okumugwem, òbolet lek kwun̄ ire mgbọ geelek ni?
Sà ìre unaan̄-ejit kwun̄ ìboyok kubọk ukan̄
isi ire mgbọ geelek mọnọ?
47 Jei Okumugwem, kawuuk ibe ke ugwem n̄a ìre mgbidim;
ìre owu òrom otutuuk ebilene ito me ikike ni?
48 Ìre ekene ogwu ebilene kpokwu mkpa?
Sà ìre ekene ogwu ebilene
obokọt ibọkọ lek kan̄ isan̄a me ubọk udọn̄ mkpa?
49 Ogwukaan̄-ene, mọmọ adasi imumechieen̄ kwun̄ ya
ochieekbe Debit use ibe ke owu òkpolọlọ irọrọ iso?
50 Jei Ogwukaan̄-ene, kawuuk ochak
ekichak emi gwun̄ ikwaan̄ kwun̄;
kawuuk unyechieen̄ owuwa ido ekinyi emi.
51 Jei Okumugwem, kawuuk si ochak ebi ochicha kwun̄
ekichak ogwu ubọọn̄ owu ogobobe ito,
mè ikiyomo ọmọ me ere geelek îsibe.
52 Ìtọn̄ Okumugwem ìre mgbọ geelek;
ikup ikeya, mè ikup ikeya!