Uriaak isasa inwọnọ mkpa
Okwa bọn kè Kora. Ebekikọkọt. Ìkup inyi ogwu òjeen̄ okwa: Kọt gọọk ida okwa “Ufialek mè osusut.” Okwa Eyiman ogwu Ejira okọtbe.
88
Jei Okumugwem, owu ore Awaji ogwu òkinyan̄a emi;eririeen̄ mè ikarek ǹkito ito inyi owu.
2 Nye lek nọ uriaak n̄a;
gban̄ si ito nkito inyi owu.
3 Ufialek mônikeme emi ikpan̄;
mkpa îre emi chieen̄.
4 Ebi ene mêkiririin̄ ibe ke mkpa îsibi emi me lek;
unye ge ikeyi ìkasik emi me emen.
5 Owu ojit emi itele;
ǹnikup kubọk ebi ekpan̄be mè ifuun̄ ìlalaak me udọn̄;
ebi owu òkayaka ìkaan̄ nkeek geege ofolek;
òkayaka ìkpọ si chieen̄ me lek.
6 Owu omaan̄ emi me udọn̄-ufuun̄ òdọdọk enenen,
mè itele emi me ama ekwukwu ere òdudun,
mè idọk kubọk emen irem.
7 Unaan̄-ejit kwun̄ îkeme emi enenen;
îmeen̄ emi kubọk ogbururu onin̄ okwaan̄.
8 Owu orọ ebi une n̄a elibi etele emi;
owu orọ ema ejọ ejit me lek n̄a;
nnin̄ inwaan̄ me emen ufialek;
kpunu ikọkọt isibi.
9 Ujaralek nkibọkọ îtap emi ǹnàan̄;
jei Okumugwem, usen geelek ǹkigwen owu,
mè ikikaak ubọk n̄a ikiriaak owu.
10 Ìre òborọ uyeke uyeke ikwaan̄ cha
inyi ebi ìkwakwaan̄ ni?
Sà ìre ebi ìkwakwaan̄ mênan̄a ikeke initọn̄ owu?
11 Ìre ebi ìkwakwaan̄ ekekikọt itumu imumechieen̄ kwun̄ isibi ni?
Sà ubọk owu okikeke inye me lek ikọ kwun̄,
ìre ebi ìkwakwaan̄ ekekikpa me ama ekwukwu?
12 Ìre ebi efuun̄be me ejit ijọn̄ ere òdudun
mîriọọn̄ uyeke ikwaan̄ cha okisi ni?
Sà ìre ebi ìsi ama ekire kpekika
mîriọọn̄ ata inu kwun̄?
13 Ire emi, jei Okumugwem, ǹkito ito inyi owu;
ewelegwe geelek ǹkiriaak owu
ibe owu òtap ubọk ònyi emi.
14 Ìre keke orọ ojitbe emi itele,
mè ida isi isan̄a emi me lek?
15 Akarake nrebe sọntiik gwun̄ ke nkwook ukwook,
mè ikup me emen ubọk mkpa;
osusut okinyi emi îtak emi lek ita;
ǹkayaka ìriọọn̄ inu mbarọ.
16 Uyok uyok unaan̄-ejit kwun̄ ìmemeen̄ emi isan̄a;
ikpele ukpook unaan̄-ejit kwun̄ îkpukpuku emi igwook.
17 Bene me ewelegwe re ikakwun̄,
unaan̄-ejit kwun̄ îmeen̄ emi kubọk mun̄ ile;
ìkanyinyi emi irek me agan̄ geege.
18 Owu orọ ebi unene n̄a mè ebi mmabe
ekpebe emi lek me lek;
udun gaalek oyaka inikana emi okokop.