Okwa Itọn̄ 90

IKPA ÒSO INI

Okwa 90–106

Awaji mè ebilene

Uriaak kè Mosis, ogwu eyi Awaji.

Ogwukaan̄-ene, irak kwun̄ ke eji ekiluk

nan̄a me ukot re me ukot.

2 Sabum owu onirorom ogoon̄;

sabum owu onirorom lek ijọn̄ mè otutuuk linyọn̄;

bene me mgbọ ikakaan̄ge itata

si re mgbọ ikakaan̄ge itata;

owu ore Awaji.

3 Owu okibe bọn ebilene egwu ekom efon achiaan̄

ere ema enan̄abe,

mè owu orọ si inyi ema egwu ekom ekana achiaan̄.

4 Me lek kwun̄, obop acha ge kiji ìbet lek usen ge kpọi;

ìbet lek iyakwut òraraka,

mè ibet lek mgbidim mgbọ me eririeen̄.

5 Owu okikwọọk eji ije kubọk agbugbuk;

eji ekup kubọk mun̄umun̄ ilaak ikike;

eji ebet lek mbubet òkititibi;

6 me ewelegwe, îra ibum otu isibi,

mè isan̄a inwan̄ isibi, mè inan̄a ikeke;

isire ikakwun̄, îra igen̄ inwan̄ isan̄a me lek, mè ikwu.

7 Unaan̄-ejit kwun̄ òkikpan̄ eji isan̄a;

uyok-ejit kwun̄ òkitet eji ukpook enenen.

8 Ijo inu eji ekirọ, owu oriọọn̄ isan̄a kpai;

echi eji erọbe me nlelet, ìkpọkpọ isibi utoon̄ me isi kwun̄.

9 Owu òkinaan̄ ejit inyi eji otutuuk usen ugwem kiji;

owu ofieek otu ifuk acha ugwem kiji igbidim,

kubọk mgbọ efuuk ge ene ochobe.

10 Otu ifuk acha ugwem kiji ìre akọp acha jaaba gaalek;

ogwu ònyenye lek oluk iso akọp acha jeeta.

Ire, otutuuk mgbọ ya ìre ufialek mè kwulukwulu;

sọnja mgbọ, ugwem îra ita, eji mîra ijibi wup.

11 Kpunu ene geege òrarak iriọọn̄ unye

eyi unaan̄-ejit kwun̄ okikaan̄ me lek ene;

ogwu òkakaan̄ ukpook kwun̄ me emen,

ọmọ oriọọn̄ inu ofolek

unye uyok uyok unaan̄-ejit kwun̄

okikaan̄ me lek ene.

12 Eya orọ, jeen̄ eji ubọk eji mêsabe iluk ugwem

kubọk ebi ìrọriọọn̄ ibe ke usen ugwem kiban̄ ìkawa,

inyi eji ekeluk usen geelek kubọk ebi ìriọọn̄ inu.

13 Jei Okumugwem, ìre unaan̄-ejit kwun̄

ìboyaka mgbọ owa ni?

Soso, gwu kom na me lek kiji,

mè kaan̄ nsan me lek kiji ebi ikwaan̄ kwun̄!

14 Jeen̄ eji imumechieen̄ mgbọ geelek kwun̄

ewelegwe geelek,

ufuna eji mêkibele ejit,

mè ikinwọọn̄ unwọọn̄ otutuuk usen ugwem kiji.

15 Nyi eji unwọọn̄ òkekem me lek ufieejit onyibe eji;

nyi eji unwọọn̄ òkekem

me lek otutuuk acha ukwook otetbe eji.

16 Soso, tele eji ebi ikwaan̄ kwun̄

emun̄ ikpele ikwaan̄ owu okirọ;

tele si nsabọn kiji emun̄ òrirọ kwun̄.

17 Ogwukaan̄-ene Awaji kiji, tele nnwọn kwun̄ ikup inyi eji,

mè rọ ubọk ikwaan̄ kiji ije ijaan̄ inyi eji;

soso, rọ ubọk ikwaan̄ kiji ikeke inye.