Uriaak ibebeek ntap-ubọk
Uriaak kè Debit.
86
Jei Okumugwem, rieen̄ utọn̄ gban̄ uriaak n̄a,mè rọ inu nkibeek owu,
mije emi ìre ogwu ijo irek mè ogwu una.
2 Sun̄ emi me ugwem,
mije emi nkaan̄ ukpook kwun̄ me emen;
Owu ore Awaji n̄a;
nyan̄a emi, ke emi ìre gwun̄ ikwaan̄ kwun̄,
ogwu òtotoon̄ ejit me lek kwun̄.
3 Kaan̄ ata ejit me lek n̄a, jei Ogwukaan̄-ene;
îre owu ke nkito lek inyi usen geelek.
4 Jei Ogwukaan̄-ene, rọ inyi ejit n̄a,
emi ogwu ikwaan̄ kwun̄, ibele,
mije îre owu ke nkiriaak.
5 Mije owu onwọn,
mè ikikup me mbem-lek itetele ijo inu inyi ene;
ebi geelek ìkiriaak owu,
òkimumun̄ ema me chieen̄ mgbọ geelek.
6 Jei Okumugwem, nọ uriaak n̄a,
mè nọ ukpo nkitaan̄ ibeek owu mbeek.
7 Owu ke nkigwen usen uyọrọlek isitet emi,
mije owu okirọ otu uriaak n̄a inyi emi.
8 Ogwukaan̄-ene,
kpunu awaji geege ebi ofifi ido ekiriaak
òbet lek kwun̄;
kpunu si ikwaan̄ ema erọbe òbet lek echi owu orọbe.
9 Owu orom otutuuk ido geelek;
ema mênu initọbọ ebum inyi owu,
mè itọn̄ owu ibe owu omin.
10 Owu gaalek ore ogwu ilile,
mè ogwu òkirọ uyeke inu;
owu mege ore Awaji.
11 Okumugwem, jeen̄ emi oniin̄ oweekbe ibe emi ǹgọọk,
ufuna ǹsiki ibot ǹgọọk owu me atikọ;
rọ mè ǹsa ejit ge ǹkemmin erieen̄ kwun̄.
12 Jei Ogwukaan̄-ene, Awaji n̄a,
mâsa otutuuk ejit n̄a ikitọn̄ owu;
mâkimin erieen̄ kwun̄ ire mgbọ geelek.
13 Mije owu okaan̄ ikpele imumechieen̄ me lek n̄a;
owu orọ inyi emi ǹnwọnọ udọn̄ mkpa.
14 Jei Awaji, ebi ugumulek mêkinu emi uyọrọlek me lek;
ogbo ebi afa ekiweek ikpakpan̄ emi;
ema kpesa owu igwen inu geege.
15 Ire, Ogwukaan̄-ene, owu ìre Awaji
ogwu ejit nsan mè ogwu atata nnwọn;
owu òkakigwat lek ìnaan̄ ejit;
owu ìre ogwu ikpele imumechieen̄,
mè ogwu ògbegbe ibe etoon̄ ejit me lek.
16 Soso, yaka isi kpọ emi,
mè kaan̄ emi nsan me lek;
nyi emi, gwun̄ ikwaan̄ kwun̄, unye kwun̄,
mè nyan̄a emi, gwun̄ ogwu usun̄ kwun̄ enenwaan̄.
17 Okumugwem, jeen̄ emi ijejeen̄ ibe ke owu orọ emi ata inu,
inyi esip itet ebi ìkicha emi,
mije, ema mêmun̄ ibe ke owu otap ubọk inyi emi,
mè ikat si emi ejit.