Uriaak ibebeek nnwọn inyi ido
Ìkup inyi ogwu òjeen̄ okwa. Okwa bọn kè Kora.
85
Okumugwem, owu onwọn eru me lek bọn kè Jekọp,ebi ìluk me ijọn̄ kwun̄;
owu orọ inu ikpọk ije ijaan̄ inyi ema.
2 Owu oben nrọ-nlọ ebi eyi kwun̄ isan̄a,
mè itele otutuuk ijo irọrọ kiban̄.
3 Owu oyaka unaan̄-ejit kwun̄ ito,
mè itet uyok-ejit kwun̄ me lek kiban̄ ikaan̄.
4 Jei Awaji, ogwu òkinyan̄a eji,
sun̄ eji me oka irek kiji ya,
mè tele inanaan̄ ejit inyi eji.
5 Ìre owu mônaan̄ ejit inyi eji ire mgbọ geelek ni?
Sà ìre unaan̄-ejit kwun̄ môkup nan̄a me ukot re me ukot ni?
6 Ìre owu òkpoyaka irọ me eji egat ugwem,
ufuna eji ebi eyi kwun̄
ekaan̄ unwọọn̄ me emen kwun̄ ni?
7 Jei Okumugwem,
jeen̄ eji imumechieen̄ mgbọ geelek kwun̄,
mè nyan̄a eji.
8 Tele m̀gban̄-nu inu Okumugwem Awaji obotumu;
mije ọmọ môtumu ikọ òbonyi eji ebi kan̄ esuuk;
eji ebi ọmọ okikaan̄ ejit nsan me lek,
mè ire eji kpeyaka igwu ikom
isi irọ inu mbubut cha eji ekirọ.
9 Ọmọ îbem lek inyanyan̄a ebi ìkinyi ọmọ ulibi,
inyi eji ebi ìluk me ijọn̄ yi mêmun̄ umin kan̄.
10 Awaji mômun̄ eji me chieen̄ mgbọ geelek,
mè inyi eji atikọ kan̄;
eji mêkirọ ata irọrọ,
mè iluk me esuuk.
11 Ebi eyi Awaji me linyọn̄ mêkeke inye me lek Awaji;
ọmọ ogwu òkup me emen inyọn̄ môrọ ema nnwọn.
12 Okumugwem mônyi eji nnwọn kan̄;
ijọn̄ kiji môgwogwook mfut enenen.
13 Ata irọrọ ìre orọmijọn̄ kan̄;
inu geelek îkirọ, ìkirọ ikpọ ikeya.