Awaji ore ogwu mkpulu òmimin ichit
Okwa kè Asafu.
82
Awaji îmọnọ irek kan̄ me etete ebi eyi kan̄;mè ikifieek oyerebet inyi ebi ibot mkpulu.
2 Awaji ìbe ema,
“Ìre mgbọ owa ke enyi ebekifieek nlilọ oyerebet ire?
Sà ìre mgbọ owa ke enyi ebekilibi chieen̄ ebi òkpaka ibot,
mè ikigọọk ema ikeke ire?
3 Ìgbini ikọ ibot ebi ugbọọn̄ mè ibot bọn kpà-nte;
ìnyi ebi una ubọk mè ebi ijo irek unen kiban̄.
4 Ìnyan̄a ebi kpenye lek mè ebi una-lek ìsibi;
ìtaba ema ìsibi me irak ubọk ebi òkpaka ibot.
5 “Ebi òkpaka ibot chi kperiọọn̄ inu geege;
kpebekọkọt si igobo inu geege itet;
ema ekitutun ikana me emen udun eyi ngan,
mè irọ ibe unen oyerebet ita me linyọn̄,
mè ikan ichichaka isan̄a.
6 Ire enyi, ǹkitumu ibe ke enyi ekup kubọk Awaji;
enyi otutuuk ìre bọn Awaji Ogwu Òbebene Ichit.
7 Ire, enyi ebekwaan̄ kubọk ebilene ekikwaan̄;
ugwem kinyi môkaan̄ okputut
kubọk eyi ebi ìkpukpulu sabum enyi.”
8 Jei Awaji, îre owu okaan̄ ido geelek;
nan̄a keke, mè bọkọ linyọn̄ kpọ!