Okwa ijọk
Nteme òkup inyi ogwu òjeen̄ okwa: Igọọk me ida okwa ebi Gat. Okwa kè Asafu.
81
Ìtaan̄ ukpo ìkọt okwa ìnyi Awaji ogwu òkinyi eji unye;ìtaan̄ ukpo unwọọn̄ ìnyi Awaji kè Jekọp!
2 Ìbene okwa, mè ìsulu ekpete;
ìsa uneen̄ ile mè uneen̄ ija ìkwak okwa òtotop.
3 Ìwut otita ìsa ìbene ijọk;
ìwut me ijọk Aya Onyan̄,
mè iwut me ebon onyan̄;
ìwut otita me usen ijọk kiji.
4 Ìrọ inu yi, mije, îre ikan ebi Ijeren;
îre si ida eyi Awaji kè Jekọp onyibe.
5 Ọmọ otọ ibe ebi otoko kè Josefu erọ ikeya,
mgbọ ọmọ osibibe isi akọn̄ me lek ebi Ijipiti.
Nnọ ida ge nkariọọn̄ge okibe:
6 “Emi mfeme enyi ulobo akpan me oguga,
mè isan̄a enyi me lek unye ikwaan̄.
7 Mgbọ ufialek otetbe enyi,
enyi mîgwen emi ibe ǹnyan̄a enyi,
nnyanyan̄a enyi;
me emen isinyọn̄ òkisosook ke nlet inyan̄a enyi;
emi nroon̄ enyi ikpọ me otu mun̄ echi Meriba.
8 Ebi n̄a, ìgban̄ itataba ubọk me utọn̄ nkitaba enyi;
ebi Ijeren, mweek ibe enyi egban̄ utọn̄ enyi emi.
9 Ikakaan̄ ofifi awaji;
ikatọbọ ebum si ìnyi ofifi awaji.
10 Emi nre Okumugwem Awaji kinyi,
ogwu òsan̄a enyi isibi me ijọn̄ Ijipiti;
ìkama uga kinyi,
inyi ǹtap inu ǹjot enyi otu.
11 “Ire, ebi n̄a ebi Ijeren kpeweek igbagban̄ utọn̄ me ida n̄a;
kpechieek igọgọọk emi igbaan̄ inu irọ.
12 Eya orọ, njijit ema itele me lek unye-ibot kiban̄,
inyi ema erọ ike ejit kiban̄ otọbe inyi ema.
13 Jei, mebe ebi n̄a, ebi Ijeren, mîgban̄ utọn̄ inyi emi;
mebe ema mîluk ubọk mweekbe ibe ema eluk,
14 kè nra itim ikpan̄ ebi ochicha kiban̄ me ikafiatge mgbọ;
kè nra ijeen̄ ebi oriara kiban̄ ikpele unye n̄a.
15 Ebi ìchacha Okumugwem
mêgele igwook me ukpook me isi kan̄;
osusut kiban̄ môbia ire mgbọ ikakaan̄ge itata.
16 Mebe ebi n̄a mîgban̄ utọn̄ inyi emi,
kè masa akpa wit ònwọnwọn ichit ikpukpo ema owot,
mè nsa aran̄ akwọọk ònan̄a me lek ewuuk
nnyi ema erie ejot.”