Uriaak ibebe Awaji ikpọk isun̄ ido me irek kan̄
Nteme òkup inyi ogwu òjeen̄ okwa: Igọọk me ida okwa “Lili eyi Inyan̄a-ibot”. Ata-ikọ kè Asafu. Okwa.
80
Jei, owu ogwu òkikpukpo ebi Ijerenkubọk ene okikpukpo arọọn̄ kan̄,
nọ eji ida;
owu ogwu òkije me isi bọn kè Josefu
kubọk isi urum arọọn̄,
soso, nọ ida kiji;
owu ogwu òkup me etete ebi mbem emen inyọn̄ iba,
jeen̄ utoon̄ kwun̄ sibi.
2 Bene unye kwun̄ jeen̄ ebi otoko kè Iferem
mè Benjamin mè Manasi,
mè na nyan̄a eji.
3 Jei Awaji, yaka irek kiji nyi eji ma;
soso, kaan̄ nsan me lek kiji,
inyi owu mônyan̄a eji!
4 Jei Okumugwem, Awaji Ogwukaan̄ Inyọn̄ mè Ijọn̄,
kpa mgbọ ke owu obonaan̄ ejit ire,
mè ijit uriaak ebi eyi kwun̄?
5 Ito îkana inu ema ekirie,
mè ire si inu ema ekinwọ ulobo ulobo.
6 Owu orọ ibe eji ekana inu òkisibi etim
inyi ebi ido ìluluk ikana eji;
ebi ochicha kiji ekisa eji ichak imọm.
7 Jei Awaji Ogwukaan̄ Inyọn̄ mè Ijọn̄, yaka irek kiji nyi eji;
soso, kaan̄ nsan me lek kiji,
inyi owu mônyan̄a eji.
8 Eji ekup kubọk olik gerep;
owu osa eji me Ijipiti isibi,
mè irieen̄ ebi ofifi ido isan̄a me lek ijọn̄ kiban̄,
mè isa eji ebi eyi kwun̄ iniwop me ijọn̄ kiban̄.
9 Owu ònenen̄e ijọn̄ ya isun̄ ijaan̄ lek,
mè isa eji iniwop me inyọn̄ ijọn̄ ya,
mè irọ ibe eji echon eso otutuuk lek ijọn̄ ya.
10 Eji mîmumana iwa enenen,
mè ichon ikana otutuuk lek ogoon̄,
mè iwele ichit lek ijọn̄ ya,
kubọk olik gerep okinene inyunyọnọ ichit ibot uti.
11 Eji mîwele ichit lek ijọn̄ ya,
ibene me okwaan̄ ile Mediterenia
isi igwook me okwaan̄ Yuferetis.
12 Mgbọ keyi, ìre keke oyaka inirọ ni
eyi owu òkayaka ìbem eji kubọk okibem?
Kpọ, ebi ichen ekpọkpọ ikije itibi lek ijọn̄ ya,
mè ikichichim mfut kiji.
13 Ebi ochicha kiji mîjijaka eji
kubọk okodi oron ojijaka oron;
ema enikifum inu me ama kiji kubọk anam onin̄ uko.
14 Jei, Awaji Ogwukaan̄ Inyọn̄ mè Ijọn̄,
soso, gwu kom na me lek kiji ma;
owu me emen inyọn̄ okupbe;
soso, taak chieen̄ kpọ,
mè mun̄ eji,
mè kpọ chieen̄ me lek kiji, eji olik gerep kwun̄.
15 Kpọ eji chieen̄ me lek,
kubọk olik gerep osabe unye kwun̄ iwop;
kpọ eji bọn kwun̄, ebi owu orọbe ibe ekaan̄ unye;
tet eji riaak me lek kwun̄.
16 Ebi ochicha kiji mîjijaka eji isan̄a,
kubọk ekitap ukan̄ iwọp olik gerep ikpan̄,
mè ifieek ito;
soso, yaka chieen̄ gana ere nyi ema,
mè jijaka ema.
17 Ire, sun̄ mè bem ogwu agan̄ ubọk ulom kwun̄;
gwun̄ ebilene ya,
ogwu owu otapbe unye me lek inyi lek kwun̄.
18 Eji kpebeyaka igba udun̄ ifit owu mgbọ geege;
sun̄ eji me ugwem, ke eji mêkiriaak owu.
19 Jei Okumugwem, Awaji Ogwukaan̄ Inyọn̄ mè Ijọn̄,
yaka irek kiji nyi eji ma;
soso, kaan̄ ejit nsan me lek kiji,
inyi owu mônyan̄a eji.