Uriaak ibebe Awaji itim ikpan̄ ebi ochicha ebi Ijeren
Ebekikọkọt. Okwa kè Asafu.
83
Jei Awaji, kakpọkpọ ìriaan̄ ere;san̄a amọn;
kakpọkpọ ìkup ikeya ìkikpọ!
2 Kpọ, ebi ochicha kwun̄ mîgwu lek ikom inyi akọn̄;
ebi ìchacha owu mêkinyan isi inyi owu.
3 Ema mêkitọt otitọt me nlelet ibak ebi eyi kwun̄;
mêkitọt otitọt ibak ebi owu okibem.
4 Ema ekibe, “Ìna eji egen̄ ido ebi Ijeren esan̄a,
inyi erieen̄ kiban̄ ichep ire mgbọ geelek.”
5 Kpọ, ema mîbọp oru,
mè inyan̄a ibot igbagbaan̄ lek itọbọ
inu akọn̄ me lek kwun̄, Awaji.
6 Ema ìre ebi Edọm, mè ebi Isimen,
mè ebi Mowabu mè ebi Aga.
7 Ebi Gebali mè ebi Amọn melek ebi Amalek,
mè ebi Filisia melek ebi ama Taya, òwa si me lek.
8 Ebi Asiria si mîgbaan̄ ibọp melek kiban̄;
otutuuk kiban̄ ekigọọk ebi Amọn mè Mowabu,
bọn owot iman kè Lọt, ikeke.
9 Awaji, soso, yaka ubọk gwook ema me lek
kubọk orọbe ebi Midian,
mè irọ si Sisera mè Jabin me okwaan̄ Kison.
10 Owu okpan̄ ema isan̄a me Endọ,
ema ekukup me ijọn̄ igọk ita kubọk ifin anam.
11 Rọ ebi ibot kiban̄ cha inu orọbe Orep mè Jebu;
rọ ebi ìkikpulu ema inu orọbe Jeba me Jalimuna,
12 ebi mgbọ ìbebe,
“Eji ebọkọ ijọn̄ Awaji okaan̄be esa erọ eyi kiji.”
13 Jei Awaji n̄a, chon ema kana kubọk mfuun̄,
mè yiyala ema kubọk nchat inwan̄
efet okiben iwut ikana ere.
14 Ike ukan̄ okitaka oron ile iriọk;
ike alọm ukan̄ okibumu itaka lek ogoon̄,
15 ikeya si, sa egwijo kwun̄ rieen̄ ema si chik,
mè sa uramun̄ kwun̄ tap ema ukpook me lek.
16 Jei Okumugwem tap esip deke ema me isi,
mege ema mênube initọbọ ebum inyi owu.
17 Soso, rọ esip itet ema,
mè uga ukpook inin̄ ema me lek ire mgbọ geelek,
mè ema ekwaan̄ eta.
18 Rọ inyi ema eriọọn̄ ibe ke owu gaalek,
ogwu erieen̄ kan̄ orebe Okumugwem,
ore Awaji Ogwu Òbebene Ichit me otutuuk linyọn̄.