Ukarajit me emen uyọrọlek
Ìkup inyi ogwu òjeen̄ okwa: Ìkup inyi Jedutun. Okwa kè Asafu.
77
Mbọn̄ ukpo igwen Awaji;mbọn̄ ukpo enenen igwen ọmọ,
inọnọ ida ukpo n̄a;
2 Mgbọ uyọrọlek otetbe emi, mweek Okumugwem;
kpunu ogwu òkọkọt ikat emi ejit;
otutuuk eririeen̄, ǹkatetet ubọk ìkaan̄
irariaak uriaak inyi Okumugwem.
3 Nsikikeek Awaji,
ìkirọ emi lek nyanyanya;
mgbọ nsikeek inu ofolek kan̄,
ǹkakikọkọt ìkup.
4 Îrọ ibe chieen̄ n̄a ifat me eririeen̄;
ǹkakọt ìlaak;
lek îwọ emi enenen,
mè itap emi mbuuk.
5 Nnenikeek oka oka usen cha òraraka,
mè ikeek si acha ukot oka mgbọ cha òraraka.
6 Nkeek si mgbọ cha
otu n̄a okire okwa okwa otutuuk eririeen̄;
emen ejit n̄a okekisisaak emi;
nkekido lek n̄a ibe:
7 “Ìre Ogwukaan̄-ene ìbokpọkpọ ijit eji ni?
Sà ìre isi kan̄ ìkpoyaka itọtọn̄ọ me lek kiji ofifi mọnọ?
8 Ìre imumechieen̄ mgbọ geelek kan̄ îta ni?
Sà ìre use kan̄ îchieekbe eji ìkayaka ìkeke mọnọ?
9 Ìre Awaji ìwuwuuk ikakaan̄ ejit nsan me lek kiji ni?
Sà ìre ọmọ ìkayaka ìkaan̄ ejit nsan,
bak me lek înaan̄be ejit mọnọ?”
10 Nnenibe, “Inu òtataka emi lek ichit ìre
ke Awaji, Ogwu Òbebene Ichit
ìkayaka ìsa unye kan̄ ìrọ inu me ibot kiji.”
11 Mâkikeek ikpele inu echi owu Okumugwem orọbe;
mâkeek uyeke inu cha orọbe me ukot ikaan̄.
12 Mâkikeek otutuuk inu owu orọbe;
mâkeek si nke nke ikwaan̄ cha osibe.
13 Jei Awaji, oniin̄ kwun̄ ìre oniin̄ òkup me mbuban;
kpunu awaji òmimin ibet lek kwun̄ Awaji kiji.
14 Owu ore Awaji òkirọ uyeke inu;
owu ojeen̄ ebi ido geelek ikpele unye okaan̄be.
15 Owu osa unye kwun̄ inyan̄a bọn kè Jekọp,
mè bọn kè Josefu ebi eyi kwun̄ isibi.
16 Jei Awaji, mgbọ okwaan̄ otoon̄be chieen̄ me lek kwun̄,
ukpook îtet,
irem okwaan̄ ototo ejit.
17 Mgbọ ya, oduku inyọn̄ îchimi ibot igwook;
isinyọn̄ ososook me akpabin inyọn̄;
omumen-inyọn̄ omumumen iso agan̄ geelek.
18 Isinyọn̄ okekigọt ida kan̄ inunuun̄ ikije;
omumen-inyọn̄ omumumen itoon̄ ere gbei me linyọn̄;
ijọn̄ oraran, mè isisik jiki jiki jiki.
19 Owu oje isaba okwaan̄,
mè ije itibi ugwuuk okwaan̄,
ire, kpemun̄ akpat ukot kwun̄.
20 Owu osa ebi eyi kwun̄ ije kubọk urum arọọn̄,
sa me ubọk kè Mosis melek kè Erọn.