Okwa Itọn̄ 76

Awaji ogwu òkitim ikpan̄

Ìkup inyi ogwu òjeen̄ okwa: Mêsa nkwukwak echi olik ikwak. Okwa kè Asafu. Ebekikọkọt.

Mîriọọn̄ Awaji me Ijeren;

erieen̄ kan̄ îtaan̄ etip me Juda.

2 Ìluk me uwu kan̄ me Jeruselem,

me inyọn̄ ogoon̄ Sayọn.

3 Ere ya ke îfaan̄ oraan̄ ebi ochicha ukan̄ okisak me otu cha,

mè ifiat si agbọ mè oge akọn̄

mè otutuuk nroon̄ akọn̄ kiban̄.

4 Jei Awaji, umin kwun̄ îgana;

owu òkije òrirọ òrirọ ika inan̄a me inyọn̄ ogoon̄

ere okupbe itim ikpan̄ ebi ochicha kwun̄.

5 Mîtet ebi akọn̄ kiban̄ ebi unye

ibọkọ inu geelek ema ekaan̄be;

ema elalaak ilaak mkpa;

kpunu ene geege me lek kiban̄ òkọkọt ibene ubọk.

6 Mgbọ owu Awaji kè Jekọp oramabe ema,

inyinya kiban̄ mè uji akọn̄ mè ebi ìkup me emen

erururọn̄ọ ikwaan̄ isan̄a.

7 Ire owu Okumugwem,

otutuuk ene ekitetet ukpook kwun̄;

ejit isinaan̄ owu, kpunu ogwu òkikọt ikeke me isi kwun̄.

8 Owu òkikup me emen inyọn̄ ikifieek oyerebet;

ebi linyọn̄ mîra itet ukpook;

kpekisisik lek.

9 Ema kpekisisik lek mgbọ owu Awaji onan̄abe ikeke

ikifieek oyerebet isa ikinyan̄a ebi ekitutuku me linyọn̄.

10 Ejit ebilene ekinaan̄ môsa itọn̄ ijet owu;

ebi mênwọnọbe unaan̄-ejit kwun̄,

owu môbọp ema ikam.

11 Ìchieek Okumugwem Awaji kinyi use,

mè ìrọ inu ya enyi echieekbe ọmọ use;

enyi otutuuk ebi ìkiluk igbet lek kan̄,

ìsa uche kinyi ìjet ọmọ, Awaji, ogwu ekitetet ukpook kan̄.

12 Ọmọ okigele ebi mkpulu ebi ìkigumu lek isiki,

mè ikitap ebi ubọọn̄ ilile me linyọn̄ ukpook me emen.