Awaji ogwu oyerebet
Ìkup inyi ogwu òjeen̄ okwa: Igọọk me lek Kajijaka. Okwa kè Asafu. Ebekikọkọt.
75
Jei Awaji, eji mîtọn̄ owu,mè ikpọk itọn̄, mije, owu okup igbet ere;
ebi ene me ere geelek mêkọt ikpa uyeke inu orọbe isibi.
2 Awaji otutumu ibe, “Nra isun̄ mgbọ mâsibibe oyerebet;
mâsibi oyerebet ònenen.
3 Mgbọ linyọn̄ môkisisik;
inu geelek erombe okekiran;
îre emi ntọbọ ọdọ kan̄ inye gboi.”
4 Ọmọ orọ mbe ebi gogolek,
“Ikayaka ìgugo lek nu,”
mè ibe ebi òkpaka ibot,
“Ikayaka ìbene oguga.
5 Ikayaka ìbene oguga ìfo inyọn̄,
ikayaka ìtumu ikọ ìgugo lek.”
6 Ìkpọ, ntim-mkpan̄ ìkakinan̄a me agan̄ mbum-ura,
mè ìre me agan̄ ichep-ura,
ìkakinan̄a si me agan̄ inyọn̄,
mè ìre agan̄ osiki.
7 Îre Awaji okisibi oyerebet;
ọmọ okibene usini ene ifo inyọn̄,
mè òkogele usini ene osiki ijọn̄.
8 Okumugwem înaan̄ ejit enenen;
unaan̄-ejit ya ìkup kire miin̄
etapbe ibọk me lek me emen ekpen̄,
Okumugwem otetet ekpen̄ ya ikaan̄ me ubọk;
môtọkọ miin̄ ibọk ya inyi ebi òkpaka ibot me linyọn̄;
otutuuk ebi òkpaka ibot cha
mênwọnwọ miin̄ ya ire ebon.
9 Emi mâkikpa ata inu Awaji kè Jekọp orọbe
ire mgbọ geelek;
mâkikọt okwa itọn̄ inyi ọmọ.
10 Ọmọ môjijaka unye ebi òkpaka ibot ekaan̄be;
ire, unye eyi ebi ata irọrọ ìbokinyenye ifo isi.