Mfufuk ubọk ikwaan̄ Awaji me etete ebi kan̄
Ijeen̄-inu kè Asafu.
78
Ebi n̄a, ìgban̄ utọn̄ me lek ikan n̄a,mè ìsiki utọn̄ ìnọ inu nkitumu.
2 Mâtumu ikọ me urọk;
mâbum ibot ikọ òdọdọk,
mè ikup nlelet karake ukot ikaan̄.
3 Ikọ cha ìre inu eji enọbe, mè iriọọn̄;
echi ebi nte kiji ekpabe inyi eji.
4 Eji kpebelet inu chi me lek nsabọn kiban̄;
eji mêkpa ikpele unye Okumugwem okaan̄be
inyi ebi ukot òkinu me isi,
mè ikpa si ikwaan̄ ògbegbe itọn̄ echi îsibe,
mè uyeke inu echi îrọbe si.
5 Awaji înyi ebi Ijeren, bọn kè Jekọp, ikan mè nteme,
mè inyi ema ida ibe ejeen̄ nsabọn kiban̄ ikan cha.
6 Ikeya, ukot echi òbogọọk, ebi kpemaman-nu,
mêriọọn̄ ikan cha mè nteme cha,
mè iyaka isa si ijeen̄ bọn kiban̄.
7 Sa me ikeyi, ema kpebewuuk ikwaan̄ Awaji osibe;
ire, mêtoon̄ ejit me lek Awaji,
mè irọ inu înyibe ida ibe erọ.
8 Ema kpebekup kubọk ebi nte nte kiban̄ ekupbe;
ebiba ìre atalek ebi unye-ibot,
ebi ìfefieek lek inan̄a me lek Awaji;
ejit kiban̄ ìkatoon̄ me lek Awaji;
ema si kpegban̄ utọn̄ inyi Awaji.
9 Ebi otoko kè Iferem ìre ebi ìkaan̄ oraan̄ mè ogbaan̄,
mè iriọọn̄ ubọk ekisook;
ire, me usen akọn̄, ema elilim isan̄a kpai.
10 Mije ema kpetet inyan̄a-ibot
Awaji onyan̄abe melek kiban̄ inye;
kpesusun̄ si ikan kan̄.
11 Ema mîwuuk ikpele ikwaan̄ Awaji osibe inyi ema,
mè uyeke inu ema emun̄be îrọbe bak me lek kiban̄.
12 Awaji îrọ owuwa uyeke inu me isi ebi nte nte kiban̄,
me ijọn̄ uko ama Sowan òkup me ido Ijipiti.
13 Awaji îchili oniin̄ me ejit okwaan̄,
mè irọ inyi mun̄ ikeke
kubọk ngigo me agan̄ iba oniin̄ ya,
mè isa ema ije me oniin̄ ya isaba okwaan̄.
14 Îsa oduku inyọn̄ ijeen̄ ema oniin̄ me ikarek,
mè isa utoon̄ ukan̄ ijeen̄ me eririeen̄.
15 Îrọ ewuuk iraan̄ ibak me emen èwê,
mè inyi ema mun̄ owuwa owuwa enwọbe,
kubọk ìkinan̄a me okwaan̄ igbuk.
16 Îrọ inyi mun̄ igbuk isibi me lek ewuuk,
kubọk okwaan̄ okigbuk.
17 Ire, ema echechieek mkpa ikirọ Awaji ilọ me emen èwê,
mè irọ ejit inaan̄ Awaji Ogwu Òbebene Ichit.
18 Ema mîgen ibak itọ Awaji ikpọ me emen ejit kiban̄,
sa me idodo ọmọ inorie eyi òlọlọk ema ebek.
19 Ema mînye chieen̄ inyi Awaji ikibe,
“Ìre Awaji môkọt isan̄a inorie
isibi me emen èwê inyi eji ni?
20 Me atikọ, ọmọ îsulu ewuuk ibum,
mun̄ ògbugbuk osisibi me emen ewuuk,
mè igbọọk kubọk okwaan̄;
ire, ìre ọmọ môkọt inyi ebi kan̄ inorie,
sà ìre môkọt inyi ema anam ni?”
21 Mgbọ Okumugwem onọbe inu ema etumube,
inanaan̄ ejit enenen me lek kiban̄;
iraria ukan̄ iwọp ebi Ijeren;
ikeya ke unaan̄-ejit kan̄ okpọk me lek bọn kè Jekọp,
22 mije, ema kpechieek me lek Awaji;
kpetotoon̄ si ọmọ ejit me lek ibe ke mônyan̄a ema.
23 Ire, Awaji otutumu ikọ inyi akpabin inyọn̄,
mè itọ ibe emen inyọn̄ igwuku ibook kubọk isotu,
24 mè inyi ema inorie ònan̄a me isinyọn̄ ibe erie;
inorie yi ke egwen mana;
înyi ema akpa ònan̄a me isinyọn̄.
25 Ebilene ikike ererie inorie ebi osat ekirie;
Awaji ìnyinyi ema inorie ya òjot òjot.
26 Awaji îrọ efet agan̄ mbum-ura
inan̄a me akpabin inyọn̄ iwut;
îsa unye kan̄ irọ efet agan̄ osiki iwut si,
27 mè iria anam ibaan̄ ichit ere
kubọk mfuun̄ ijet ebi kan̄ etaka;
anam ya ìre unọn òkaan̄ uwop;
unọn cha ìwa kubọk achiaan̄ òkup me agba awaji.
28 Awaji orọrọ unọn cha isusọn
me ijọn̄ me eden̄ m̀gba-ǹgwele ukan̄ ebi kan̄,
mè ikana uwu ọfọ kiban̄ cha okokop.
29 Ema etataka mè itaka ijot owot dum,
mije Awaji ìnyi ema inorie ya ema eweekbe me ijo ebek.
30 Ire, ijo ebek kiban̄ ìkatele ema;
inorie ya me otu kiban̄,
31 Awaji ochichili unaan̄-ejit kan̄ ibook me lek kiban̄,
mè irọ ebi unye me etete kiban̄ ekwaan̄,
mè irọ okpan isi nsabọn irieen̄ ebi Ijeren ekwaan̄ eta.
32 Ubọk geelek Awaji orọbe inu chi geelek,
ema ekpọkpọ ikirọ si ijo inu;
ubọk geelek îrọbe owuwa uyeke ikwaan̄ kan̄ cha,
ema kpetoon̄ si ọmọ ejit me lek.
33 Eya orọ, Awaji ofefieek usen kiban̄ igbidim,
mè isa mkpa uwuuk-lek isọp acha kiban̄ ifiin̄.
34 Mgbọ Awaji okpan̄be usini kiban̄,
ebi ìsisik etotolek initet ọmọ ukot,
mè igwu ikom me ijo inu kiban̄,
mè igwat lek ibeek ibe itap ubọk inyi ema.
35 Mgbọ ya ke ema etolek inikeek ibe
ke Awaji ìre ewuuk òkikput ema lek,
mè ikeek ibe ke îre Awaji
Ogwu Òbebene Ichit okinyan̄a ema.
36 Ire, otutuuk cha ìre ofiaan̄ ofiaan̄;
ataak ataak ke ema ekikan̄.
37 Ejit kiban̄ ìkup iba iba me lek kan̄;
ema kpekeke inye me lek
inyan̄a-ibot kan̄ melek kiban̄.
38 Ire, Awaji okakaan̄ nsan me lek kiban̄,
mè itele nrọ-nlọ kiban̄;
ìkayaka ìkpan̄ ema;
îtet unaan̄-ejit kan̄ ikaan̄ owuwa mgbọ,
mè ikeme uyok-ejit kan̄ isiki,
39 mè iyaka inikeek ibe ke ema ìre ebilene ikike
ìkup kubọk efet òkiwuwut ije,
ìkayaka ìkigwu ìkom ìnu.
40 Mgbọ ema ekupbe me emen èwê,
ema mîkpaka ibot inyi ọmọ owuwa mgbọ,
mè irọ ọmọ inu ufieejit owuwa mgbọ.
41 Ema mîgba udun̄ ifit Awaji,
mè itọ ọmọ ikpọ,
mè itap unan me ejit Awaji ogwu òkup mbuban,
ogwu ema ebi Ijeren ekiriaak.
42 Ema mîwuuk ikpele unye kan̄,
mè iwuuk usen ya înyan̄abe ema
me ubọk ebi ochicha kiban̄.
43 Ema mîwuuk si ikwaan̄ òkup nke nke echi îrọbe,
mè uyeke inu îrọbe me ijọn̄ uko
ama Sowan me ido Ijipiti.
44 Ọmọ îrọ okwaan̄ ebi Ijipiti
mè otutuuk mudim kiban̄ geelek ikana eje,
inyi ema ekayaka ìkaan̄ mun̄ ìnwọ.
45 Îria ijo nson inu, inyi initap ema uyọrọlek igak lek,
mè iria àkwọọk inu, inyi inisisaak ema.
46 Îria akaka ituuk me kpa chieen̄ kpa chieen̄,
inyi initaka inu ema ewopbe ijijaka ita kpai.
47 Îsa si ibot mgbọlọ inifiat uko gerep kiban̄,
mè isa senesene mun̄ ewuuk
ikpan̄ uti sikamọ kiban̄ isan̄a.
48 Îsa eriembuuk kiban̄ inyi ibot mgbọlọ ikpaan̄ isan̄a,
mè isa arọọn̄ kiban̄ inyi isinyọn̄ isook ijijaka isan̄a.
49 Awaji înaan̄ ejit uyok uyok me lek kiban̄,
mè iria urum ebi osat ibe enenyi ema ufialek,
mè erọ inyi ugwem kiban̄ ijat enenen.
50 Awaji ìkatet unaan̄-ejit kan̄ ìkaan̄;
ìkajuuk si ugwem ebi Ijipiti cha ìtele;
ire, ìsasa ijo orukan̄ inikwọkọ ema isan̄a.
51 Îkpan̄ adasi gwun̄ geelek òre enerieen̄
me ototun̄ ukan̄ ebi Ijipiti geelek;
îjijaka adasi mfut ebi owot iman kè Am eboon̄be
me mgbọ unye-lek kiban̄ isan̄a kpai.
52 Mgbọ ya ke înikpulu ebi eyi kan̄ isa ije isibi,
mè ibem si ema me emen èwê,
kubọk ogwu òkpukpo arọọn̄ okibem urum arọọn̄ kan̄.
53 Îsa ema ije, unan ìkare ema lek;
ukpook si ìkatet ema;
ire, okwaan̄ orerie ebi ochicha kiban̄.
54 Ikeya ke îsa ema inire okike
ere ijọn̄ mbuban kan̄ obenebe;
òrere lek ogoon̄ ya îsabe unye kan̄ itim ikpan̄ ibọkọ.
55 Mgbọ ebi eyi kan̄ ekinu,
ilililaba ebi ìluluk me lek ijọn̄ ya isan̄a,
mè idọmọ ijọn̄ ya iche me otoko me otoko,
mè isa si uwu ife cha inyi ebi Ijeren eluk me emen.
56 Ire, ebi eyi kan̄ etọtọ ọmọ, Awaji Ogwu Òbebene Ichit, ikpọ,
mè irọ ejit inaan̄ ọmọ,
mè ijit isusun̄ ikan kan̄.
57 Ofifi, ema mîgba udun̄ ifit ọmọ,
mè irọ inu ofiaan̄ ofiaan̄ me lek kan̄,
kubọk ebi nte nte kiban̄ erọbe si,
mè iyaka ikije ǹkọọn̄ ǹkọọn̄ me lek kan̄
kubọk oraan̄ ònwunwun.
58 Ema ekisi isun̄ isi yọk, isa ikirọ inyi Awaji inaan̄ ejit,
mè ikiriaak mkpọmfaka,
isa ikirọ ejit kan̄ ikup unwe unwe.
59 Mgbọ Awaji omun̄be inu chi, ejit onanaan̄;
sa me ikeya, ikpọkpọ ebi Ijeren ilọ chieen̄ isi ge.
60 Îjit Uwu Mbuban kan̄ eyi ikpa anam,
òkup me ama Silo itele,
uwu ere îlukbe me etete ebi ebilene,
61 mè itele ibe akọn̄ irie okop inyan̄a-ibot kan̄,
ere unye kan̄ mè òrirọ kan̄ okupbe,
inyi isi inin̄ me ubọk ebi ochicha.
62 Îtele si ebi eyi kan̄ ekwaan̄ me akọn̄
me ubọk ebi ochicha kiban̄,
bak me lek ejit ònanaan̄ ọmọ.
63 Nsabọn irieen̄ kiban̄ ekwakwaan̄ ita me akọn̄,
nsabọn ibaan̄ kiban̄ ebabak,
kpunu ebi ìdo ema me lek nwa.
64 Ebi ngwugwa kan̄ ekwakwaan̄ mkpa afa;
ebi nwakpa kiban̄ kpekọt ito ema.
65 Me òta kan̄, Okumugwem obebene lek,
kubọk ogwu ònanan̄a ikeke me ilaak,
kubọk ene unye ònwọnwọ miin̄ isa okigana ere,
66 mè inililaba ebi ochicha kan̄ isan̄a,
mè irọ ema inu esip eyi ikakaan̄ge mgbọ itata.
67 Ire, îjit bọn owot iman kè Iferem gwun̄ kè Josefu,
ìkayaka ìgobo otoko keya.
68 Ìyaka inigobo otoko kè Juda,
mè igobo ogoon̄ Sayọn eyi îmun̄be me chieen̄.
69 Ere ya ke înama Uwu Mbuban kan̄,
eyi òbene kubọk ogoon̄,
mè ikeke ikam kubọk linyọn̄ îrombe
ibe môkup ire mgbọ geelek.
70 Inenigobo Debit gwun̄ ikwaan̄ kan̄,
mè imọnọ ọmọ me ere îkikpukpo arọọn̄ mè ebot.
71 Ìmọnọ ọmọ isan̄a me lek ikpukpukpo bọn arọọn̄,
mè isa inito me lek ubọọn̄ me etete bọn kè Jekọp,
ibe inikpukpo ebi eyi kan̄, ìrere ebi Ijeren.
72 Debit îsa ejit unen eru ikpọ ema chieen̄ me lek
ubọk ògbegbe,
mè isa ata ubọk ikpulu ema, mije, îriọọn̄ inu.