Okwa ufieejit
Ìkup inyi ogwu òjeen̄ okwa. Igọọk me ida ekerekwukwu inyọn̄ uti Terebint òkup me ujọn̄ọ ere. Okwa Debit okọtbe mgbọ ebi Filisia ekpebebe ọmọ me Gat. Ekikọt ususuk.
56
Jei Awaji, kaan̄ emi nsan me lek;ebi ene mîsa akọn̄ inimeen̄ emi;
ebi ochicha kpenyinyi emi irek mgbọ geege.
2 Bene me ewelegwe re ikakwun̄,
ebi ìkikọp emi ekinu emi akọn̄ me lek;
ebi ìkitim emi etim me lek mîwa enenen.
3 Mgbọ ukpook isitet emi,
ǹkitoon̄ owu ejit me lek.
4 Ntoon̄ Awaji ejit me lek,
ikeya orọ, ǹkafieek owot;
ntọn̄ ọmọ me lek ikọ kan̄.
Ìre keke ke ogwu ebilene ikike obokọt irọ emi?
5 Bene me ewelegwe re ikakwun̄,
ema kpekichieek ibe ikọ n̄a ikaan̄ ebon;
mgbọ geelek, ijo ekiket ke ema ekikeek ibak emi.
6 Ubọk ema ekiweek isasan̄a ugwem n̄a,
ema egbagbaan̄ lek itọbọ,
mè ilileek ikikpọ ukot ije n̄a.
7 Jei Awaji, kpe ema mkpukpe inu ikpak ema erọbe;
sa me unaan̄-ejit da ife cha tọọn̄ gwook me ijọn̄.
8 Owu oriọọn̄ jen̄ejen̄e n̄a;
mun̄ ito n̄a îjot iko kwun̄ dum dum.
Ìre otu ifuk mun̄ ito n̄a kpunu me ikpa kwun̄ ni?
9 Usen nsitaan̄ ukpo igwen owu,
ebi ochicha n̄a mêgwu ikom;
nriọọn̄ ibe ke môre ikeya,
bak me lek, owu Awaji òkeke me agan̄ n̄a.
10 Ntọn̄ Awaji me lek ikọ kan̄;
ntọn̄ Okumugwem me lek use îchieekbe.
11 Ntoon̄ ejit me lek Awaji;
ikeya orọ, ǹkafieek owot.
Ìre keke ke ogwu ebilene obokọt irọ emi?
12 Jei Awaji, use nchieekbe owu òwa me ibot n̄a;
mâgwa ngwugwa isa ibe owu onirọ.
13 Owu obem emi, inyi nkakwu,
mè irọ ufuna nkakwaak ìrọn̄;
eya orọ, mâkọt ikije me isi kwun̄ me ògat ugwem.