Uriaak ibebeek Awaji ntap-ubọk
Ìkup inyi ogwu òjeen̄ okwa: Igọọk me lek Kajijaka. Okwa Debit okọtbe me emen ǹkororok mgbọ îlibibe inwọnọ Sọọlu. Ekikọt ususuk.
57
Rọ emi nsan;jei Awaji, rọ emi nsan,
mije ǹtoon̄ ejit me lek kwun̄;
ǹlet lek n̄a ikup me irak uwop kwun̄
mege ufialek òkitoon̄ emi môtabe.
2 Ntaan̄ ukpo igwen Awaji Ogwu Òbebene Ichit;
ngwen Awaji ogwu òkirọ nkeek kan̄ iso inyi emi.
3 Môkup me emen inyọn̄ inyan̄a emi;
môsa esip itet ebi ìkitutuku emi;
Awaji môjeen̄ emi imumechieen̄ kan̄ mgbọ geelek,
mè ijeen̄ emi atikọ kan̄ si.
4 Ebi ochicha ekakana emi okokop,
ema ekup kubọk egbe àtat ukan̄ okisak me chieen̄;
ejeek kiban̄ ìsọọk kubọk otu otunwa mè otu oraan̄;
otu alọm kiban̄ ìreke kubọk oge akọn̄.
5 Jei Awaji, owu omin enenen me akpabin inyọn̄;
ikeya si, umin kwun̄ îso otutuuk linyọn̄.
6 Ebi ochicha n̄a mîtip ufe inyi emi;
ejit îfieek emi, ekwukwu n̄a îwọ;
ema mîrọkọ udọn̄ me oniin̄ nkije;
ire, ema me lek kiban̄ gaalek eyaka irọn̄ inin̄ emen.
7 Mbieen̄ ejit inye me lek kwun̄, jei Awaji;
iin̄, mbieen̄ ejit inye;
mâkọt okwa isa itọn̄ owu.
8 Ibot ejit n̄a, nan̄a keke!
Uneen̄ ile n̄a mè uneen̄ ija n̄a, ìnan̄a ìkeke!
Mânan̄a ikeke ikwak uneen̄ sabum egwe ònowele.
9 Jei Ogwukaan̄-ene, mâtọn̄ owu me isi ebi ido geelek;
mâkọt okwa inyi owu me etete ebilene geelek.
10 Mije, imumechieen̄ okikaan̄ me lek ene mgbọ geelek
îmin enenen ire akpabin;
atikọ kwun̄ îmin enenen ire lek oduku inyọn̄.
11 Jei Awaji, owu omin enenen
isaba iraka akpabin inyọn̄;
ikeya si, umin kwun̄ îso otutuuk linyọn̄.