Uriaak ogwu ogwu unene osabe isi inyam ewe
Ìkup inyi ogwu òjeen̄ okwa: Mêsa nkwukwak echi olik ikwak. Ijeen̄-inu kè Debit.
55
Jei Awaji, soso, nọ uriaak n̄a,mè kada utọn̄ ìsan̄a me lek mbeek n̄a!
2 Nọ emi ida, mè rọ inu nkido owu;
ekiket mônikpan̄ emi;
ejit n̄a ìkare ijọn̄,
3 bak me lek ida ukpo ebi ochicha n̄a ekitaan̄ inin̄ emi lek,
mè ebi ikpak ìsasa akọn̄ inu emi lek;
ema ekirọ emi nnaan̄,
mè isa unaan̄-ejit irọ emi ikan̄.
4 Ejit n̄a ìkare ijọn̄ mije ukpook;
ufieek-owot mkpa înin̄ inwaan̄ emi emen.
5 Ukpook òkitet emi, mè ikiran emi lek;
uga ukpook mônikeme emi ikpan̄.
6 Jei, mebe nkaan̄ uwop kubọk ekerekwukwu,
kè mwulu nnan̄a ǹsi ǹsiki efuuk.
7 Iin̄, kè mwulu ǹjọn̄ọ ere,
mè mfo emen èwê ere ònọnọọn̄ ǹsi ǹkup.
8 Kè magwagwat lek isi iweek ere maletbe lek,
mè inan̄a me isi unye efet mè egwijo.
9 Jei Ogwukaan̄-ene, tap wọlọwọlọ me etete kiban̄;
kachieek ibe ema ekaan̄ otu ge,
mije, inu afa mè ibaak ìgagak emen ama.
10 Eririeen̄ mè ikarek,
ebi ijo ife ekinween̄ lek
ijijen̄e ikana me inyọn̄ mgban ama,
mè ikitap ufialek mè inu ikpak igak emen ama.
11 Ema ekpọkpọ ikifiat inu igwook me otutuuk ere me emen ama,
mè ikirọ ikeme ene;
mfeen̄ ìkpota me oyet ile ama ya.
12 Ibe more ogwu ochicha orọ emi ochak,
kè m̀me;
ibe more si ogwu oriara okpọ emi isiki chieen̄,
kè nje agba agba me lek.
13 Eyi, ìyaka inire owu, ogwu ogbo n̄a,
ogwu melek n̄a ekigbaan̄ ije,
owu ogwu melek n̄a erebe otu unọn mè ijọn̄.
14 Eji mîkigbaan̄ ikpa ata utop utop ukpatu,
mè ikigbaan̄ ije me urum ene inin̄ Uwu Mbuban.
15 Tele kè ema ekwaan̄ mkpa uwuuk-lek;
tele kè ema eje ukot ukot efon awaji;
mije ijo inu ìjojot emen uwu kiban̄,
mè ijot emen ejit kiban̄ si.
16 Ire emi, Awaji ke nkigwen;
Okumugwem okekinyan̄a emi.
17 Ewelegwe mè ikarek mè ikakwun̄,
ǹkitaan̄ ukpo ufialek n̄a inyi ọmọ;
ọmọ okekinọ emi ida.
18 Îkinyan̄a emi me ubọk akọn̄ òkinu emi lek;
ubọk geelek ebi ìkisa akọn̄ inu ewabe enenen.
19 Awaji, ogwu ubọọn̄ òkup bene me karake akat,
mônọ emi ida;
môjijaka ema,
mije, ema kpekinwene ejit igọọk Awaji;
kpekitet si ukpook me lek Awaji.
20 Ema mîbene akọn̄ me lek
ebi ìkup me esuuk melek kiban̄,
mè ichaka inyan̄a-ibot ema egbaan̄be inyan̄a.
21 Ikọ kiban̄ ìkikup eriook eriook,
ire, ochicha îwuwọ emen ejit kiban̄ isan̄a;
usem kiban̄ si, ìre mmemem mmemem kubọk aran̄,
ire, oge akọn̄ ke ema ewọọk ikaan̄ me ubọk.
22 Bene uyọrọlek kwun̄ tap me ubọk Okumugwem;
môkpọ owu chieen̄ me lek;
ọmọ ìkpochieek ibe akọn̄ ifieek ebi ata irọrọ,
mege ire mgbọ ikakaan̄ge itata.
23 Ire, owu Awaji môda ebi ìkpan̄ ene mè ebi ataak
itap me udọn̄;
ema kpebeluk
ire ìkike iba ugwem kiban̄.
Ire, eyi n̄a,
owu ke ntoon̄ ejit me lek.