Uriaak ibebe Awaji inyan̄a ene
Ìkup inyi ogwu òjeen̄ okwa: Mêsa nkwukwak echi olik ikwak. Okwa ijeen̄-inu Debit okọtbe mgbọ ebi Jifu esi ikpa inyi Sọọlu ibe ke Debit îlibi inilet me agan̄ kiban̄.
54
Jei Awaji, sa erieen̄ kwun̄ nyan̄a emi sibi;sa unye kwun̄ rọ inyi ebi ene eriọọn̄ ibe ke ǹkalọ.
2 Jei Awaji, soso, nọ uriaak n̄a,
mè yaka utọn̄ gban̄ ikọ otu n̄a.
3 Ikpak ikpak lek ebi ichen mêkinu emi akọn̄ me lek;
mêkiweek isasan̄a ugwem n̄a;
ema kpesa owu Awaji igwen inu geege.
4 Ire, owu, Awaji okitap ubọk inyi emi;
Ogwukaan̄-ene, owu okibem ugwem n̄a.
5 Yaka ijo inu ebi ochicha n̄a cha gwook ema me ibot;
kpan̄ ema san̄a,
mije, owu ogbe ogwu etoon̄be ejit me lek.
6 Jei Okumugwem, mâsa me ejit n̄a
igwa ngwugwa inyi owu;
mâtọn̄ erieen̄ kwun̄,
mije, îgbe ibe etọn̄ owu.
7 Mije, owu otaba emi isibi
me emen otutuuk uyọrọlek n̄a geelek;
nsa chieen̄ n̄a imun̄ ubọk owu
otimbe ikpan̄ ebi ochicha n̄a;
eya ore inu nkiweek.