Okwa ufieejit me lek ijo inu ene orọbe
Okwa yi ìkup inyi ogwu òjeen̄ okwa. Okwa kè Debit. Ìkọt mgbọ Netan ogwu nriran onube me lek kan̄ mgbọ îgwenbe Batiseba.
51
Jei Awaji, kaan̄ nsan me lek n̄a,mije imumechieen̄ mgbọ geelek kwun̄;
sa me ikpele ejit nsan kwun̄
ben ijo irọrọ n̄a geelek san̄a.
2 Gwọk nrọ-nlọ n̄a san̄a kpai,
mè rọ inyi ǹtana me isi kwun̄.
3 Emi nriọọn̄ ijo irọrọ nrọbe;
ijo n̄a ìkikukup emi me ejit mgbọ geelek.
4 Owu gaalek ke nrọ ijo inu keyi me lek;
inu òfefieek yi nrọbe,
îre me isi kwun̄ gaalek ke nrọ;
eya orọ, osusut osulube emi, îgbe;
oyerebet otipbe emi si, înen.
5 Me atikọ, emi ìre ogwu ijo bene me usen emanbe emi;
usen nga n̄a onin̄be owot n̄a ke mbene ikana ogwu ijo.
6 Owu òkiweek ibe esa ijọn̄ ijọn̄ ejit etumu atikọ;
eya orọ, soso, jeen̄ emi iriọọn̄-inu me emen ejit n̄a.
7 Soso, sa inwan̄ mbubet isop nyan eje gwọk emi lek,
inyi orieen̄ ita emi me lek;
gwọk emi, inyi ǹtana ǹgak abalara.
8 Owu okpukpuku ukwuuk n̄a isan̄a;
mgbọ yi, soso, rọ ǹnwọọn̄ unwọọn̄,
mè m̀bele ejit.
9 Soso, kpọ chieen̄ lọ me lek otutuuk ijo inu nrọbe;
gwak nrọ-nlọ n̄a san̄a me ejit kwun̄.
10 Jei Awaji, soso rom ejit òtatana tap emi me emen,
mè nyi emi aya ekwukwu me emen n̄a,
inyi ǹkeke ǹnye me lek kwun̄.
11 Soso, katọp emi ìfiin̄ ìsan̄a me isi kwun̄ isi ge;
kabọkọ Ekwukwu Mbuban kwun̄ ìsan̄a emi me lek.
12 Soso, kpọk nyi emi unwọọn̄
òje me lek unyan̄a onyan̄abe emi,
inyi mâkọt ikirọ inu obe emi ǹrọ.
13 Mgbọ ya, mâjeen̄ ebi ijo irọrọ oniin̄ kwun̄;
ebi ijo ife mêgwugwu ikom igọọk owu.
14 Jei Awaji ogwu òkinyan̄a emi,
soso, nyan̄a emi me lek eje ene òtotoon̄ emi me ibot,
inyi mâsa ida n̄a ikọt ata irọrọ kwun̄ me okwa.
15 Ogwukaan̄-ene, chili emi otu,
inyi mâsa ikọt okwa itọn̄ owu.
16 Ngwugwa ìkponeme owu;
mebe ìkare ikeya, kè ǹgwa;
ikerere ǹgwagwa ngwugwa ewọwọp, ìkpobele owu ejit.
17 Ngwugwa owu okima
ìre ene ifefieek ejit me inu îrọbe ilọ;
ogwu ijo inu kan̄ otetbe lek, òfefieek ejit,
owu òkpojit, jei Awaji.
18 Sa me ata ejit kwun̄ rọ inu ije ijaan̄ me Sayọn;
tap ubọk, inyi enama mgban ama Jeruselem.
19 Mgbọ ya, ejit kwun̄ môbele me lek ngwugwa eyi ata irọrọ;
eji mênenigwa ngwugwa ewọwọp inyi owu,
mêsa eriembuuk igwa ngwugwa
me inyọn̄ ntook kwun̄ inyi owu.