Inu Awaji oborọ ebi ikpak
Ìkup inyi ogwu òjeen̄ okwa. Ijeen̄-inu kè Debit, mgbọ Dowegi, ogwu Edọm, osi itumu inyi Sọọlu ibe ke Debit me uwu kè Ayimelek.
52
Owu unye enerieen̄,keke orọ okisa inu ikpak okirọ igugo lek?
Imumechieen̄ Awaji ìkikukup mgbọ geelek.
2 Otu alọm kwun̄ òkitọt ene ijo,
ìbet lek akwaan̄ òrereke;
owu òkirọ inu ofiaan̄ ofiaan̄.
3 Owu oma ijo inu igak ata inu,
mè ima ataak igak ikọ ata irọrọ.
4 Owu oma usem òkitap ene unan me lek;
owu ìre ogwu otu alọm iba.
5 Awaji môfiat owu si isi ire mgbọ geelek;
mômọnọ owu isan̄a me ototun̄ ukan̄ kwun̄,
mè ichan uwu kwun̄ inọọn̄;
môjibi owu isan̄a me linyọn̄ ebi ìkup me ugwem.
6 Ebi ata irọrọ mêmun̄, mè iriki,
mè ichak owu me imọm ikibe,
7 “Ìkpọ ogwu ikasage Awaji ìrọ okwukwek akọn̄ kan̄,
ire, ìtoon̄ ejit me lek owuwa inu ubọọn̄ kan̄,
mè itet lek inye me lek ikekirọ inu ikpak.”
8 Ire, emi mâkup me uwu Awaji ikisek,
mè ikinye lek, mè ikibọọn̄ ubọọn̄ inyi isi, kubọk uti olifu;
ǹtoon̄ ejit me lek imumechieen̄ mgbọ geelek eyi Awaji.
9 Jei Awaji, mâkitọn̄ owu mgbọ geelek,
mije inu orọbe;
mâsa erieen̄ kwun̄ itoon̄ ejit,
mije, înwọn irọrọ ikeya me etete ebi eyi kwun̄.