Ngwugwa eyi Awaji okima
Okwa kè Asafu.
50
Okumugwem, Awaji otutuuk awaji geelek, îsan̄a amọn,mè igween̄ otutuuk ebi linyọn̄;
ibene me agan̄ mbum-ura isi ire agan̄ ichep-ura.
2 Awaji îtoon̄ kubọk ura inan̄a isibi me Sayọn;
ama ya òjajaan̄ kpunu itap otu.
3 Awaji kiji òkinu;
ìkarariaan̄ ere ìkinu;
alọm ukan̄ òkitaka inu iriọk okisak me isi kan̄;
uga egwijo okekijibi ikana ọmọ okokop.
4 Ọmọ îgween̄ inu òkup me akpabin inyọn̄,
mè igween̄ echi òkup me linyọn̄,
ibe enekup ekpọ ike ọmọ obosibi oyerebet inyi ebi kan̄.
5 Awaji ìbe, “Ìtitiin̄ ebi n̄a, ebi ata irọrọ, ìnyi emi;
ema ebi ìgwagwa ngwugwa isa inyan̄a ibot melek n̄a.”
6 Akpabin inyọn̄ ìkijeen̄ ibe Awaji ìre ogwu ata irọrọ,
mije Awaji me lek kan̄ ìre ogwu ibot oyerebet.
7 “Ebi n̄a, ìgban̄, ke mâtumu ikọ;
ebi Ijeren, ìgban̄, ke mâkeke ata-ikọ ikeme enyi;
emi nre Awaji, òrere Awaji kinyi.
8 Ǹkagana ikọ ìnyi enyi bak me lek ngwugwa kinyi,
mè ìre ngwugwa ewọwọp enyi ekinyi emi mgbọ geelek.
9 Ǹkado eriembuuk geege ònan̄a me uwu kinyi,
mè ìre ebot ònan̄a me lek urum ebot kinyi,
10 mije anam geelek òkup me oron ìre eyi n̄a;
otutuuk eriembuuk òkup me inyọn̄ obop ogoon̄,
îre emi nkaan̄.
11 Nriọọn̄ isi unọn geelek òluk me inyọn̄ ogoon̄;
otutuuk inu òluk me emen oron ìre echi n̄a.
12 Ire uraafiọọn̄ itaka emi, ǹkabado enyi inorie,
mije linyọn̄ mè inu geelek òkup me emen kan̄ ìre eyi n̄a.
13 Ìre ǹkitaka ufuk orie eriembuuk,
sà ìre ǹkinwọ eje orie ebot ni?
14 Ngwugwa kinyi ìbokire inyinyi Awaji itọn̄,
mè irọrọ inu geelek enyi echieekbe
Ogwu Òbebene Ichit use ibe enyi mêrọ.
15 Enyi isikirọ ikeya, ìgwen emi me usen uyọrọlek,
ke mânyan̄a enyi,
enyi mêtọtọn̄ emi.”
16 Ire, Awaji ìtumu inyi ebi òkpaka ibot ibe,
“Enyi ejeje ikichak otu me lek ikan n̄a?
Enyi ejeje ikitumu ikọ ibak inyan̄a-ibot n̄a?
17 Enyi kpema nteme,
enyi ekitọtọp ikọ n̄a ifiin̄.
18 Ogwu inọ geelek enyi emun̄be ìre unene kinyi;
enyi ekigọọk ebi ìkigan nwa ene igbaan̄ ije.
19 Otu kinyi ìbobook itutumu ijo usem;
ataak ìkakinan enyi me otu alọm.
20 Enyi ekitumu ikọ ikeme ebi ngwan̄ kinyi,
mè ikifiat bọn nga kinyi me udun̄.
21 Inu chi geelek enyi erọbe, ǹkasan̄a amọn;
enyi ekekikeek ibe ke emi ǹkup kire enyi.
Ire, mgbọ keyi, mâgana ikọ inyi enyi,
mè isan̄a ikọ nkaan̄be ikeme enyi isibi ito enyi me isi.
22 “Enyi ebi ìwuwuuk emi, Awaji, ìgban̄ utọn̄;
ire ìkare ikeya, mâgwak enyi iche;
kpunu ogwu òbonyan̄a enyi isibi me ubọk n̄a.
23 Ogwu òbebe emi ‘Onirọ’,
ene ya ìgwa ngwugwa òkinyi emi umin;
ene ya si ìkinen̄e oniin̄ kan̄ isun̄,
inyi mâjeen̄be ọmọ ubọk emi Awaji nkinyan̄a ene.”