Isasa inu ubọọn̄ itoon̄ ejit ìre burubut
Ìkup inyi ogwu òjeen̄ okwa. Okwa bọn kè Kora.
49
Ebi otutuuk ido geelek, ìgban̄ eyiyi;enyi ebi ìluk me linyọn̄, ìgban̄ utọn̄!
2 Ebi ilile, mè ebi ijija,
ebi ubọọn̄ mè ebi ugbọọn̄, ìgban̄!
3 Ikọ ònan̄a emi me otu mônyi ene iriọọn̄-inu;
usem ònan̄a emi me ejit mônyi ene ifuk-ibot.
4 Mâgwu ikom ifo lek itoto urọk,
mè ikifit uneen̄ isa ikibak ibot urọk n̄a.
5 Keke môrọ ibe m̀fieek owot
mgbọ uyọrọlek otetbe emi,
mè mgbọ ebi ochicha ekanabe emi okokop?
6 Ife chi ekisa inu ubọọn̄ kiban̄ itoon̄ ejit,
mè ikigugo lek ikpele ubọọn̄ ema ebọọn̄be.
7 Kpunu ene geege òbokọt ifaka ogwu ngwan̄ isibi;
kpunu si ogwu òbokọt ikpe ewe
ebek ugwem ngwan̄ kan̄ inyi Awaji.
8 Mije, ikpekpe ewe ebek ugwem ene minye ewe;
inu geelek mêkpebe, ìkaboso;
9 ìkabokọt irọ ibe ene ya iluk ire mgbọ geelek,
mè ikakwu ìnin̄ udọn̄.
10 Ene geelek îriọọn̄ ibe ke ebi ìriọọn̄ inu ekikwakwaan̄;
ebi burubut mè ebi welewele si, ubọk yaage;
ema ekitetele inu ubọọn̄ kiban̄ inyi ebi ofifi ife.
11 Ubọk geelek ema ekaan̄be ijọn̄ ichit ere gboi,
udọn̄-ufuun̄ kiban̄ ore uwu kiban̄ ire mgbọ geelek;
ere ema ebeluk ire eya me ukot me ukot.
12 Ene ìkabobia me irek umin kan̄;
môkwu kubọk ebi kè anam ekikwaan̄.
13 Eyi ore inu òkup inyi ebi ìtoon̄ ejit me lek kiban̄ gaalek,
mè ebi ìkigọọk oniin̄ kiban̄,
mè ikichieek me lek ikọ kiban̄.
14 Ubọk arọọn̄ okikwu,
ikeya si ke ema ebekwaan̄ inin̄ udọn̄-ufuun̄;
ema ekup me irak ubọk mkpa;
ebi ata irọrọ mêtim ikpan̄ ema me mgbọ egwe isiwele;
akpalek kiban̄ môjọjọ ita me emen udọn̄
ijọn̄ọ ere me lek uwu kiban̄.
15 Ire, Awaji môtaba emi isibi me ubọk mkpa;
ọmọ môbọkọ emi itap.
16 Kasisaak lek kwun̄ mgbọ ene okibọọn̄ ubọọn̄;
mgbọ inu ubọọn̄ okinin̄ uwu kan̄ kubọk mun̄.
17 Mije, mgbọ ọmọ isikwu,
kpunu eyi îbosa ikaan̄ me ubọk ije;
inu ubọọn̄ kan̄ ìkpogọọk ọmọ inin̄ udọn̄.
18 Ubọk geelek ibe ke mgbọ ọmọ okupbe me ògat ugwem,
ke ọmọ ìmọnọ lek kan̄ ibe ke ọmọ ìre ogwu egbanabe,
ebi ene si ekekitọn̄ ọmọ ibe ke inu îje ijaan̄ me lek kan̄;
19 ọmọ môfo igọọk ebi nte nte kan̄,
me ere ema kpebekimun̄ chieen̄
me lek utoon̄ ire mgbọ geelek.
20 Ene ogwu òkaan̄ umin,
ire, ìkagobo inu geege ìtet,
ene ya ìbokwu kubọk anam okikwu.