Okwa mgbọ ogwu ubọọn̄ isido nwa
Ìkup inyi ogwu òjeen̄ okwa: Igọọk me ida okwa “Lili.” Okwa eyi bọn kè Kora. Ijeen̄-inu. Okwa ido-nwa.
45
Ikọ òtotop înin̄ ijot emi ejit;mgbọ nkikọt okwa keyi inyi ogwu ubọọn̄,
otu alọm n̄a ìkije kubọk uti ikpa
ata ogwu òge ikpa.
2 Owu ojaan̄ uja ichit me etete bọn ebilene;
owu okaan̄ otu usem;
Awaji ìgbagbana owu ire mgbọ geelek.
3 Tobo oge akọn̄ kwun̄ nye me ebon;
unye ene ke owu ore;
owu okaan̄ òrirọ mè umin ubọọn̄.
4 Je me umin ubọọn̄ kwun̄ sibi si tim kpan̄,
me ibot atikọ mè unen oyerebet mè ata irọrọ;
sa unye oguga kwun̄ jeen̄ inu mgbugbo okirọ.
5 Ogwu ubọọn̄, oraan̄ kwun̄ cha òsisisọn otu
mônin̄ ejit ebi ochicha kwun̄ itibi agan̄;
ebi ofifi ido mêrurọn̄ọ igwook me ukot kwun̄.
6 Jei Awaji, ogboon̄ ubọọn̄ kwun̄
ìbokup ire mgbọ geelek, mgbọ geelek;
okuba ubọọn̄ kwun̄ ìre eyi ata irọrọ.
7 Owu oma ata irọrọ mè icha irọrọ ikpak;
eya orọ Awaji, ogwu òre Awaji kwun̄,
otọkọbe owu aran̄ me ibot,
mè inyi owu ubelejit igak ebi ubọọn̄ ogbo kwun̄.
8 Otutuuk ofọnti ubọọn̄ kwun̄
ìkidun̄u utop olu aran̄ mâa, mè alò, mè kasia;
uwu ubọọn̄ kwun̄, esa oduuk eniin̄ ibala;
ere ya ke nkwukwak echi olik okitaan̄ inyi owu,
isa ikirọ ejit kwun̄ ibele.
9 Bọn ebibaan̄ ebi ubọọn̄ eboon̄be
ema òwa me etete ebibaan̄ kwun̄;
ogwu ubọọn̄ enenwaan̄ owu obodo,
ọmọ òwa me agan̄ ubọk ulom kwun̄ okekebe,
mè atalek alata araran̄ ònan̄a me ama Ofiri me lek.
10 Gwun̄ n̄a enenwaan̄, gen ibot, mè siki utọn̄ gban̄;
san̄a ejit me lek ama kinyi,
mè ebi ido kinyi, mè ebi uwu nte kwun̄,
11 ufuna uja kwun̄ môlọk ogwu ubọọn̄ enenen;
siki ibot nyi ọmọ,
mije ọmọ ore ogwukaan̄ kwun̄.
12 Ebi ama Taya mêsa uche ijet owu;
ebi ìbọbọọn̄ ubọọn̄ mêniweek nnwọn me ubọk kwun̄.
13 Ubọọn̄ enenwaan̄ ogwu ubọọn̄ obodo
ọmọ òwa me emen agwut
okenbe lek ikup òrirọ òrirọ;
ofọnti àwurukù îtapbe,
esa alata araran̄ igbaalek ilọk.
14 Ofọnti àwurukù òkikekebe me lek îtapbe;
ekekisa ọmọ iban ijet owu ogwu ubọọn̄;
obaak ebibaan̄ ogbo kan̄ ebi ìkisa ọmọ iban,
mîsa ebiba si igbaalek ijet owu.
15 Mêsa me unwọọn̄ mè ubelejit isa ema inu;
ema otutuuk mêraraka inin̄ emen uwu ogwu ubọọn̄.
16 Ogwu ubọọn̄, bọn ebirieen̄ kwun̄
mêkana ubọọn̄ me irek ebi nte nte kwun̄;
owu môrọ ema ebi ìkikpulu otutuuk linyọn̄.
17 Okwa n̄a môrọ ibe erieen̄ kwun̄ itaan̄ etip ire ukot geelek;
ebi ido geelek mêtọn̄ owu ire mgbọ geelek.