Itatap ibot me lek Awaji
Ìkup inyi ogwu òjeen̄ okwa. Ijeen̄-inu bọn kè Kora.
44
Jei Awaji, eji mîsa utọn̄ kiji inọ ikpele inu orọbeme ukot ebi nte nte kiji mgbọ òraraka;
ema mîkpa otutuuk inu cha inyi eji.
2 Owu osa unye kwun̄
irieen̄ owuwa ido isan̄a me lek ijọn̄ kiban̄,
mè isa ebi eyi kwun̄ inigwook ibia;
owu osut ebi ido cha osusut,
mè irieen̄ ema isibi me lek ijọn̄ cha,
mè irọ inu ije ijaan̄ me lek ebi eyi kwun̄.
3 Ebi eyi kwun̄ kpesa oge akọn̄ kiban̄
itim akọn̄ ibọkọ ijọn̄;
ìkare unye ema ekaan̄be orọ ema etimbe ikpan̄;
ire, îre sa me unye kwun̄ mè efuuk kwun̄,
melek owu okupbe melek kiban̄ mgbọ geelek,
bak me lek owu omun̄be ema me chieen̄.
4 Jei, owu ìre ogwu Ubọọn̄ n̄a mè Awaji n̄a;
soso rọ inyi bọn kè Jekọp etim ekpan̄.
5 Sa me lek kwun̄, eji mêda ebi ochicha kiji ito;
sa me lek erieen̄ kwun̄,
eji mêjak ebi ìkije ikeme eji me ukot.
6 Ǹkasa ogbaan̄ n̄a ìtoon̄ ejit;
oge akọn̄ n̄a si, ìkpokọt inyan̄a emi.
7 Ire, îre owu onyan̄a eji me ubọk ebi oriara kiji,
mè irọ ebi ìchacha eji inu esip.
8 Awaji, îre owu ke eji ekisa igugo lek mgbọ geelek;
eji mêkitọn̄ erieen̄ kwun̄ ire mgbọ ikakaan̄ge itata.
9 Ire, mgbọ keyi, owu ojit eji itele,
mè isa esip itet eji;
òkayaka ìkigọọk urum akọn̄ kiji ìsi akọn̄.
10 Owu orọ eji ekiliin̄ itele ebi ochicha kiji;
ema ekekifum inu kiji isa irọ eyi kiban̄.
11 Owu orọ ekigwu eji kubọk ekigwu arọọn̄,
mè irọ inyi etọọn̄ eji echon ekana ido geelek.
12 Owu onyam ebi eyi kwun̄ me ijo otu ewe;
òkarie oruru geege.
13 Owu orọ ido ebi ìluluk iriaak eji ekedo eji otu,
mè irọ ebi ìluluk ikana eji ekechak eji ochak.
14 Owu orọ eji enin̄be me urọk,
mè ikana inu ebi ofifi ido ekisa ichak imọm.
15 Ulibi îta emi me lek eririeen̄ mè ikarek;
esip îwele ichit emi isi,
16 inan̄a me lek itiik mè idodo otu ebi ochicha ekido eji,
mè ochak ebi ìkima irọrọ useen̄ ekichak eji.
17 Inu chi ìkpọkpọ irọ ikeya;
ìkare ibe ke eji mîwuuk owu,
mè ìre ke eji mîgwaka inan̄a
me lek inyan̄a-ibot kwun̄ melek kiji.
18 Ejit kiji ìkanwene me lek kwun̄;
ukot kiji si ìkanan̄a me oniin̄ kwun̄.
19 Ire, owu ojit eji itele,
ibe ebi ochicha egwak eji eche kubọk ibo oron afa,
mè ijit eji itele me emen udun,
ibe eji ekwaan̄ eta.
20 Ire eji itele itọtọbọ ebum inyi owu,
mè ìyaka ire eji esi ikiriaak
mkpọmfaka ebi ofifi ido ekiriaak,
21 ìre owu Awaji kpomofat iriọọn̄ ni?
Owu oriọọn̄ nlelet inu òkup me emen ejit ene.
22 Ire, îre bak me lek eji ekigọọk oniin̄ kwun̄
ke ekikpan̄ eji mgbọ geelek,
mè ikimọnọ eji kubọk arọọn̄ ebegwugwu.
23 Okumugwem, nan̄a keke;
òjeje ikilaak?
Tọbọ jibi;
kalap eji ìto ìre mgbọ geelek!
24 Òjeje isan̄a eji chieen̄ me lek,
mè iwuuk tukutuku ekitutuku eji mè ujaralek kiji?
25 Udun̄ kiji îrọn̄ ire ijọn̄;
eji mîken achiaan̄ ibaan̄ me lek.
26 Nan̄a keke, na tap ubọk nyi eji;
faka eji sibi,
sa me lek imumechieen̄ mgbọ geelek kwun̄!