Awaji òwa melek kiji
Ìkup inyi ogwu òjeen̄ okwa. Okwa bọn kè Kora. Ebekọt igọọk me ida okwa ekigwen alamot.
46
Awaji ore unye kiji mè ere nlet kiji;ogwu ntap-ubọk òkikup melek kiji
mgbọ geelek uyọrọlek otetbe eji.
2 Ikeya orọ, ukpook geege ìkpotet eji,
ijọn̄ ikesisik,
mè ogoon̄ ikegbugbọ igwook me ejit okwaan̄.
3 Okwaan̄ ikegbugbugbut mè iriak ifuuk,
mè isa ekoon̄ itọbọ ogoon̄ isisik,
eji kpebefieek owot.
4 Okwaan̄ ge ọmọ òwa,
eyi mun̄ kan̄ okibele ejit ebi ama
ere ekitọbọ ebum inyi Awaji Ogwu Òbebene Ichit;
ama ya ke uwu îgobobe inyi lek kan̄ okup.
5 Awaji òwa me emen ama ya;
kpebekọt ijijaka ama ya;
me mgbọ ekakpọge chieen̄,
Awaji môgwat lek initap ubọk inyi ebi ama ya.
6 Wọlọwọlọ înin̄ ido geelek,
ama ubọọn̄ geelek osisisik;
Awaji ososook ida kubọk isinyọn̄,
ebi linyọn̄ ejejet ita inyi ukpook.
7 Okumugwem Ogwukaan̄ Inyọn̄ mè Ijọn̄ ọmọ òwa melek kiji;
Awaji kè Jekọp ore uwu mgban akọn̄ kiji.
8 Ìna, ìnikpọ inu Okumugwem orọbe;
ìkpọ ubọk îgbugbọbe linyọn̄ igwook.
9 Îrọ ibe akọn̄ ita me otutuuk linyọn̄;
îfaan̄ ogbaan̄, mè ijijaka otunwa,
mè itap ukan̄ iwọp uji akọn̄.
10 Okumugwem ìtumu ibe, “Ìsuuk lek,
mè ìriọọn̄ ibe ke emi nre Awaji;
emi ke ido geelek ebekimin;
emi ke otutuuk linyọn̄ ebekimin.”
11 Okumugwem Ogwukaan̄ Inyọn̄ mè Ijọn̄ ọmọ òwa melek kiji;
Awaji kè Jekọp ore uwu mgban akọn̄ kiji.