Saimọn ogwu òban Awaji
50
Îre ogwu òban Awaji, Saimọn gwun̄ kè Onias,okpọk inama Uwu Mbuban
egwakbe, mgbọ îkupbe me ugwem;
ukot kan̄ si ke enama mgban ikana Uwu Mbuban
2 Ọmọ otọbọ ọdọ mgban m̀gban iba òbebene,
mgban òbebene esabe ikana oyet egep Uwu Mbuban.
3 Me ukot kan̄ ke erọkọ udọn̄ mun̄,
ere isun̄-mun̄ òwele ikup kubọk okwaan̄.
4 Îkeek ubọk eberọ inyi ebi kiban̄ ekanin̄ me mfufiat,
mè itap mgban ikana ama isa ikwek mbin akọn̄.
5 Îjaan̄ enenen imumun̄ ubọk ebi ene ekanabe ọmọ okokop,
mgbọ isikinan̄a me emen Ere Òkup Mbuban Ichit isibi!
6 Ìkibet lek ntoronyan̄ ewelegwe me etete oduku inyọn̄,
mè ibet lek onyan̄ me òjot kan̄.
7 Ìkup kubọk ura okira
itoon̄ me lek Uwu Mbuban Ogwu Òbebene Ichit,
mè ibet lek egop ubọọn̄ okibeen̄ me etete oduku inyọn̄ òtotoon̄.
8 Ìkup kubọk ajakajak rôs me aya otu ura,
mè ajakajak lili me agba mun̄,
mè ibet lek uti olik oron Lebanọn me mgbọ ura.
9 Ìbet lek ukan̄ mè nsensi me emen ngigọ,
mè ikup kubọk ekpen̄ esabe alata araran̄
ebọn̄be ikup akpakpa irom,
mè isa otutuuk chieen̄ ewuuk unye otu ewe geelek ibala lek.
10 Ìkup kubọk uti olifu mfut ogakbe lek,
mè uti siperesi òjọjọn̄ọ itet lek oduku inyọn̄.
11 Saimọn isiniben ujuja àwurukù kan̄ ijeen̄ me lek,
mè itap ofọnti kan̄ cha òjajaan̄ ichit,
mè inene isi lek ntook mbuban,
îra irọ ibe oyet egep Uwu Mbuban ikup òrirọ òrirọ.
12 Isinibọkọ inu ngwugwa
eyi okpọkọ emen akpan me ubọk ebi ngwugwa,
mè ikeke me agba ukan̄ ere ntook,
ebi ngwan̄ ekakana ọmọ okokop kubọk ajakajak,
ọmọ ìkibet lek ogbaragbat uti olik oron Lebanọn,
eyi uti asaak okekebe ikana okokop.
13 Mgbọ bọn kè Erọn melek ofọnti òrirọ kiban̄ me lek,
isiben uche eyi Okumugwem ikaan̄ me ubọk kiban̄,
me isi otutuuk urum ebi Ijeren,
14 mè isifaka mfaka isan̄a me lek ntook,
mè isun̄ ngwugwa Ogwu Òbebene Ichit,
ogwu Okaan̄ Inyọn̄ mè Ijọn̄,
me onineen̄ me onineen̄,
15 îra ito ubọk imọnọ ekpen̄,
mè isa miin̄ gerep igwa ngwugwa miin̄ egwogwook,
mè itọkọ igwook me ebon ntook,
utop olu eyi Ogwu Òbebene Ichit,
ogwu Ubọọn̄ Otutuuk Inu, okima.
16 Bọn kè Erọn mîra itaan̄ ukpo,
mè iwut otita alata ebọbọn̄ kiban̄;
ida kiban̄ îra ikisook ifo inyọn̄,
isasa irọ Ogwu Òbebene Ichit ikeek ema.
17 Otutuuk ebi ene mîra igwat lek igbaan̄
irurọn̄ọ me ijọn̄ ikana isi ichit
itọbọ ebum inyi Ogwukaan̄ kiban̄,
Ogwukaan̄ Inyọn̄ mè Ijọn̄, Awaji Ogwu Òbebene Ichit.
18 Ebi okwa mîra isa utop ida kiban̄
igwuun̄ me lek unin̄i okwa ikikọt itọn̄ ọmọ.
19 Ebi ene ekekibeek Okumugwem Ogwu Òbebene Ichit mbeek,
mè ikup me isi Ogwu Nsan ikiriaak uriaak
mege mêfakabe mfaka Okumugwem isan̄a,
mè irọ orirọ Okumugwem ifieek.
20 Saimọn îra inigele isiki, mè ibene ubọk kan̄
ida otutuuk urum ebi Ijeren,
mè isa otu kan̄ inyi ema ugbana Okumugwem,
mè inyi erieen̄ mgbugbo kan̄ umin;
21 ema mîra ikpọk igele igwook òso mgbọ iba itọbọ ebum,
mè ibọkọ ugbana ònan̄a me ubọk Ogwu Òbebene Ichit.
Ugbana
22 Mgbọ yi, ìtọn̄ Awaji òkaan̄ otutuuk inu,
ogwu òkirọ uyeke ikwaan̄ me ere geelek,
ogwu òrọrọ eji etibi emiin̄ bene me mgbọ emanbe eji,
mè ikirọ eji inu me lek igọọk me lek nsan kan̄.
23 Kè ọmọ inyi eji ubelejit,
mè inyi esuuk me ukot kiji,
mè inyi esuuk me Ijeren, kubọk mgbọ ukot ikaan̄.
24 Kè nsan kan̄ ibia me lek kiji,
kè ọmọ ifaka eji isibi me ukot mgbọ eyi kiji.
Ikakana igwook
25 Îkaan̄ ido iba ejit n̄a ojọbe me lek,
eyi òso ita ìkarere ido mgbọ geege:
26 îre ebi ìluk me ogoon̄ Seya, mè ebi Filisia,
mè ebi mbubut cha ìkiluk me Sekem.
27 Nteme mè ngobo-ntet mè ifuk-ibot
ke nge itap me emen ikpa yi;
îre emi Jisọs, gwun̄ kè Elieja, gwun̄ kè Sirak ogwu Jeruselem,
ogwu iriọọn̄-inu ogbukube me ejit kan̄ igwook, nge ikpa yi.
28 Ubelejit môkup inyi ogwu geelek
òfafiat mgbọ ikigọọk inu chi,
mè ikween̄ itap me ejit isa iriọọn̄ inu.
29 Ire itap inu chi me irọrọ, môkaan̄ unye ikeke ida inu geelek,
mije, môkije me emen utoon̄ eyi Okumugwem.