Okwa itọn̄
51
Jei Okumugwem, Ogwu Ubọọn̄, nnyi owu itọn̄,jei Awaji Ogwu Unyan̄a n̄a, m̀be owu onirọ.
Ntọn̄ erieen̄ kwun̄,
2 mije, owu obem emi, mè itap ubọk inyi emi,
mè inyan̄a emi isibi me mfufiat,
mè otu ufe eyi otu òfiat ene otipbe,
mè otu òkikan̄ ataak itoon̄ ene.
Me isi ebi ochicha n̄a,
owu otap ubọk inyi emi, mè inyan̄a emi isibi;
3 igọọk me ubọk nsan kwun̄ ominbe, mè bak me lek erieen̄ kwun̄,
owu osan̄a emi isibi me otu ejeek ebi ìbemen emi,
mè ubọk ebi ìkiweek ugwem n̄a,
mè owuwa ufialek nkikwukwulu me emen;
4 mè inyan̄a emi isibi me emen uyok ukan̄
òbolet emi efuuk me agan̄ geelek,
mè emen ejit ukan̄ ikarege emi nsọk,
5 mè emen ejit udọn̄ ama ekwukwu,
mè ijo otu alọm mè ikọ ataak geelek,
6 mè otu òfiat ene òkifiat emi me isi ogwu ubọọn̄.
Nje iriaak me lek mkpa, ugwem n̄a îgbet ama ekwukwu.
7 Ema ekakana emi me agan̄ geelek okokop,
kpunu ene geege òbotap ubọk inyi emi;
mweek ogwu ebilene ge ogwu môtapbe ubọk,
ire, kpunu kubọk ge.
8 Nnenikeek nsan kwun̄, jei Okumugwem,
mè inu owu okirọ akarake akat,
nkeek ibe ke owu otaba ebi ìkakat ejit ikweek ikikpọ owu isibi,
mè inyan̄a ema me ubọk ebi ochicha kiban̄.
9 Nnenikup me linyọn̄ iriaak uriaak,
ikibeek ibe owu ònyan̄a emi òsibi me mkpa.
10 Ntaan̄ ukpo itumu ibe;
“Jei Okumugwem, owu ore Nte n̄a,
kajit emi ìtele me usen ufialek,
mgbọ kpunube ntap-ubọk geege
isasa itim ikeme ebi ugumulek.
11 Mâkpọkpọ ikitọn̄ erieen̄ kwun̄ mgbọ geelek,
mè ikikọt okwa isa ikibe owu onirọ.”
Owu onọ mbeek n̄a,
12 mè inyan̄a emi isibi me mfufiat,
mè itaba emi isibi me mgbọ uyọrọlek.
Mije keyi, mbe owu onirọ, mè itọn̄ owu,
mè itọn̄ erieen̄ Okumugwem.
Iweweek iriọọn̄-inu
13 Mgbọ nrebe ijija, sabum nnibebene ikekijijen̄e ije n̄a ikana ere,
iriọọn̄-inu ore inu nkido me uriaak n̄a.
14 Ǹkikup me oyet egep Uwu Mbuban ikibeek iriọọn̄-inu,
mè mweek ọmọ mege ǹre òta.
15 Bene me mgbọ nkitibi isibi
kubọk ajakajak gerep na re mgbọ nkanbe
kubọk gerep okiren̄e,
ejit n̄a ìkitotop me lek iriọọn̄-inu;
ukot n̄a îgọọk oniin̄ òtatat,
akarake ijija n̄a, ǹkigọọk akpat ukot kan̄.
16 Ǹkọkọọn̄ utọn̄ n̄a sọntiik inyi, mè ibọkọ ọmọ itap,
mè isa ikaan̄ ikween̄-inu enenen.
17 M̀kpọkpọ ikifo isi ikikween̄ ọmọ;
itọn̄ ikup inyi ogwu òkinyi emi iriọọn̄-inu!
18 Ntumu ifieek ibe ke mâluk ugwem igọọk me iriọọn̄-inu,
mè ikilibi igọọk inu ònwọnwọn,
esip geege ìkpotet emi.
19 Ǹtitim etim sabum nnikọt ọmọ ikaan̄,
eya orọ, ǹtetet lek ikaan̄ me inu geelek nkirọ.
20 Ǹsasa ejit n̄a itoon̄ me lek kan̄,
mè isa me ejit òtatana iweek ọmọ imun̄.
Eyi ejit n̄a okukup me lek kan̄ bene me adasi,
ìkpobojuuk emi itele.
21 Ulọk n̄a obieen̄ emi ifo lek kan̄,
eya orọ, nkaan̄ inu-nkaan̄ ònyenye otu ewe.
22 Okumugwem oneninyi emi alọm n̄a kubọk mkpukpe,
eyi mâsabe ikitọn̄ ọmọ.
23 Ìjuuk ìgbet emi lek, enyi ebi kpekween̄ inu,
mè ìnikup me uwu ijeen̄-inu n̄a.
24 Keke orọ okinina lek ibe inu chi înan owu?
Keke orọ okime urak-ebek òmimin ikeyi?
25 Nteme n̄a ìre ikeyi:
Ìkaan̄ iriọọn̄-inu, ikasa ikpoko ìlep.
26 Ben ebek kwun̄ tap me emen ọgbọn kan̄,
mè bọkọ iriọọn̄-inu me ibot ejit kwun̄;
ìkajọn̄ọ ere iweweek imun̄.
27 Sa chieen̄ kwun̄ kpọ, mè mun̄ ibe ke ǹkamalek ìkwook ukwook,
ire, nkaan̄ esuuk òmimin enenen.
28 Sa owuwa alata okuket lep ikween̄ inu,
iriọọn̄-inu môrọ owu òkaan̄ owuwa alata araran̄ me oruru.a
29 Kè ibot ejit kwun̄ ikaan̄ unwọọn̄ sa me nsan Awaji,
kè esip geege ikatet owu itọtọn̄ ọmọ.
30 Rọ ikwaan̄ kwun̄ me ata mgbọ,
ke Awaji môkpe owu mkpukpe kwun̄ me mgbọ kan̄.