Sirak 49

Josaya

Erieen̄ kè Josaya ìkitop ene me lek kubọk olu nsensi

eyi ogwu usọ aran̄ utop olu ogbaan̄be ifuku;

ìkinin̄i me otu ene geelek kubọk aran̄ akwọọk,

mè ikitop kubọk okwa ere ijọk miin̄.

2 Îrọ inu ònenen bak me lek îrọbe ebi ene enwene,

mè isan̄a òchichaka inu ikpak cha isan̄a.

3 Îtoon̄ ejit kan̄ inye me lek Okumugwem;

mgbọ ebi ene kpeyaka iriọọn̄ Awaji,

îrọ inyi irariaak Awaji ikeke.

Jerimaya

4 Ilọ me lek Debit, mè Ejikaya, mè Josaya,

otutuuk ebi ubọọn̄ kechilọ ìre atalek ebi ìkirọ ijo inu;

eyi ema ejitbe Ikan Ogwu Òbebene Ichit,

ebi ubọọn̄ Juda ekwakwaan̄ ita.

5 Ema mîyaka unye kiban̄ inyi ebi ofifi ife,

mè isa umin kiban̄ inyi ebi ofifi ido,

6 ebi ìnenitap ukan̄ iwop ama Awaji ogobobe,

ere Uwu Mbuban okupbe,

mè irọ ibe lek oniin̄ ama ya inọọn̄,

kubọk Jerimaya obenbe nriran itumu ibe ke môrọ.

7 Mije, ema mîrọ ọmọ nnaan̄,

ogwu esun̄be me mbuban karake me emen owot

isa irọ ogwu nriran,

ibe inijibi, mè ifiat, mè ijijaka,

mè iyaka inama, mè ikpọk iwop si.

Ijikien

8 Îre Ijikien omun̄ ilaak ọkpọchieen̄ eyi ujamgbugbo Awaji,

eyi Awaji ojeen̄be ọmọ me inyọn̄ uji ekpirikpo

ebi mbem emen inyọn̄.

9 Mije, îkeek ebi ochicha kan̄, mè iria ibot otu ile isa isulu ema osusut,

mè irọ ibe ebi ìkigọọk oniin̄ òtatat ekaan̄ oruru.^a

Akọp mè ebi nriran iba

10 Ire akọp mè ebi nriran iba cha,

kè ukwuuk kiban̄ ikup me udọn̄-ufuun̄ ikisek,

mije, ema ekatbe ebi kè Jekọp ejit,

mè isa ichechieek etoon̄be ejit me lek inyan̄a ebi Ijeren.

Jerubaben mè Jesuwa

11 Mọmọ ubọk eji ebesa imin Jerubaben?

Ọmọ ìkup kubọk mkpọtubọk iman òriọọn̄

me ubọk agan̄ ulom Okumugwem.

12 Ikeya ke Jesuwa gwun̄ kè Josadak okup;

me ukot kiban̄, ema mînama Uwu Mbuban,

mè isan̄a ebi ene ìkup me mbuban isibi inyi Okumugwem,

ebi esun̄be iban ujamgbugbo eyi kpotabe.

Neyemaya

13 Ikekeek si Neyemaya ìre ikpele inu,

îre ọmọ okpọk inama mgban̄ kiji cha òjijijaka,

mè ibọp otunchit mè itap mgba me lek,

mè ikpọk inama uwu kiji.

Ebi nte nte

14 Ene geege òre ìkike melek kè Enọk ìkakup me linyọn̄,

mije, ebeben ọmọ inene inan̄a me linyọn̄ ifo inyọn̄.

15 Kpunu si ogwu emanbe òbet lek Josefu,

òrere ogwu ibot inyi ebi ngwan̄,

ogwu ebi kiban̄ ekibieen̄ lek me lek;

ikerere ukwuuk kan̄, enyinyi si umin.

16 Mînyi si Sem mè Set mè Enọs umin,

ire, me etete otutuuk inu geelek òkifuuk efuuk ugwem,

echi Awaji orombe, ogwu ògagak ìre Adam.