Ilaija
48
Ilaija owọwọọk isibi, ogwu nriran òkup kubọk ukan̄,ikọ kan̄ okekisak kubọk ukan̄ nlak.
2 Isasa akan̄ initap inyi ema,
sa me ulọk kan̄, akan̄ ya okpakpan̄ ema igele.
3 Îsa me ikọ Okumugwem igon isinyọn̄ ichit, ibot ìkarep;
mgbọ ita ke îgwen ukan̄ isibi ijọn̄.
4 Ilaija, owu omin me irọrọ uyeke uyeke inu!
Ekene okaan̄ inu ìbosa igugo lek kubọk kwun̄?
5 Owu ojomo ogwu òkwukwu me mkpa,
inan̄a me ama ekwukwu isibi, sa me ikọ Ogwu Òbebene Ichit.
6 Owu otaba ebi ubọọn̄ isa isi ikpan̄,
mè itaba si ebi ilile me inyọn̄ mkpilaak kiban̄ isa isi ikpan̄.
7 Owu onọ Okumugwem okan̄be inu inyi owu me Saina,
mè inọ si osusut îsabe irọ ebi ochicha kan̄ useen̄ me Orebu.
8 Owu otọkọ ene aran̄ me ibot irọ ema ubọọn̄,
inyi enesan̄a useen̄ inu,
mè itọkọ ene aran̄ isa irọ ema ebi nriran,
inyi enebọkọ irek kwun̄.
9 Esa ogbolodom òkisak kubọk ukan̄ iben owu ifo emen inyọn̄,
me emen uji ekpirikpo eyi inyinya òkisak ukan̄ ekitaba ije.
10 Mîge ibe, mgbọ isikem, ke owu môkana isibi,
inisuuk uyok uyok unaan̄-ejit Awaji sabum ònobum osibi afa afa.
Owu mônirọ ebi ute egwu ejit ekom efo lek ebi bọn,
mè isa otoko ebi Ijeren ikpọk inito me irek kiban̄.
11 Ebi ìmumun̄ owu mîkaan̄ ubelejit,
mè ebi ìkwakwaan̄ me imumechieen̄,
mije, eji si mêluk ugwem.
Ilaisia
12 Mgbọ ogbolodom ya okanabe Ilaija ichit bùk,
ekwukwu Okumugwem oninin̄ ijot emen kè Ilaisia.
Me otutuuk ugwem kan̄, ìkasisik me isi ogwu mkpulu geege,
ene geege si ìkakọkọt ìkeme ọmọ ìnwan.
13 Inu geege ìkayọt ìgak ọmọ irọrọ,
mgbọ îkwube si, akpalek kan̄ îben nriran.
14 Me ògat ugwem kan̄, îrọ uyeke inu;
me mkpa, ikwaan̄ kan̄ si ìkup nke nke.
15 Ubọk geelek otutuuk inu chi orọbe,
ebi ene mîjit si igwugwu ikom,
kpetele si ubọk me irọrọ ijo inu,
mege ekpulube ema isan̄a me ido kiban̄,
mè ichon ema ikana otutuuk linyọn̄.
Ene inen mè inen gaalek esik me etete kiban̄,
ire, ekup me irak ogwu ibot uwu kè Debit.
16 Usini kiban̄ mîrọ inu ònenen,
ire, usini ekpọkpọ ikirọ ijo inu isọkọ me lek ijo inu kiban̄.
Ejikaya
17 Ejikaya înama mgban ikwek ama kan̄,
mè itaba mun̄ itap me emen;
ìsa okwukwut itibi oniin̄ me emen ewuuk,
mè inama udọn̄ mun̄ igwook.
18 Me ukot kè Ejikaya, Senakerip îjibi akọn̄ inu,
ìria ogwu isi akọn̄ kan̄ inu;
îbene ubọk kan̄ itim akọn̄ me Sayọn,
mè iriak lek otu ile otu ile igọọk me ugumulek kan̄.
19 Ejit ebi Jeruselem osisisik, ubọk kiban̄ oraran,
ofaak otetet ema kubọk enenwaan̄ uman okifiak.
20 Ire, ema enyanyana ubọk ifo inyọn̄,
mè igwen Okumugwem ogwu nsan,
Ogwu Mbuban òkukup me emen inyọn̄ igwat lek inọ,
mè isa Asaya ininyan̄a ema.
21 Okumugwem ogbugbugbọ inin̄ emen orieen̄ akọn̄ ebi Asiria,
ogwu osat kan̄ okpakpan̄ ema isan̄a kpai.
22 Ejikaya îrọ inu òtatat me lek Okumugwem,
mè ikeke inye ije me oniin̄ Debit nte nte kan̄ ojebe,
kubọk ikpele ogwu nriran Asaya,
ogwu nriran kan̄ okikekeke, otọbe inyi.
Asaya
23 Me ukot kè Asaya ke ura okpebe inyi udun̄,
isasa me ikeya irọ inyi ugwem ogwu ubọọn̄ ijọn̄ọ.
24 Sa me unye eyi ekwukwu Awaji, îmun̄ mgbọ òkup me isi,
mè ikat ejit ebi ìkup me ufieejit me Sayọn.
25 Îchili inu òborọ isi ire òta mgbọ ibook,
mè ikpọk mbum inu òlelet sabum inu cha onirọrọ.