Netan
47
Me udun̄ kan̄,Netan onanan̄a isibi iniben nriran me ukot kè Debit.
Debit
2 Ike ekisan̄a okpọn̄ isun̄ esese me lek ngwugwa esuuk,
ikeya ke esan̄a Debit isun̄ esese me lek ebi Ijeren.
3 Îgọọk ebi kè egbe àtat ifit ifit kubọk ìre bọn ebot,
mè igọọk ibo nriọk ifit ifit
kubọk ìre bọn arọọn̄ ònan̄a me urum arọọn̄.
4 Mgbọ îrebe ijija, îkpan̄ ogwu ujọn̄ọ ile,
mè isan̄a ebi kiban̄ esip me isi,
mgbọ îwumbe ewuuk olik mgbọlọ
itọbọ itet Golayat ogwu ògugo lek ya,
igbugbugbọ irọn̄ me ijọn̄.
5 Mije, Okumugwem Ogwu Òbebene Ichit ke îgwen,
Okumugwem orọrọ ibe ubọk ulom kan̄ inye,
isasan̄a ikpele ogwu akọn̄ itọbọ ikpan̄,
mè irọ unye ebi eyi kan̄ itaan̄ etip.
6 Eya ke emin ọmọ me lek akọp akọp obop ene îkpan̄be,
mè itọn̄ ọmọ me lek ugbana
Okumugwem ogbanabe ọmọ
mgbọ ekwuun̄be ọmọ òrirọ òrirọ ọgbọn ubọọn̄ me ibot.
7 Mije, ìkpakpan̄ ebi ochicha kan̄ isan̄a me agan̄ geelek,
mè ijijaka ebi Filisia, ebi oriara kan̄, ita kpai,
mè ikpukpuku unye kiban̄ isan̄a mege ire chereyi.
8 Me inu geelek îrọbe, ìkibebe Ogwu Mbuban,
Ogwu Òbebene Ichit onirọ,
mè ikitumu umin Awaji isibi;
îma Ogwu Òrom kan̄,
mè isa me otutuuk ejit kan̄ ikikọt okwa itọn̄ ọmọ.
9 Îgwook ebi okwa me isi ntook,
inyi ekesa ida kiban̄ ekọt unin̄i unin̄i okwa.
10 Îtap uja me lek ijọk geelek,
mè idọmọ ibot mgbọ kiban̄ me acha,
ike ema ekitọn̄ erieen̄ mbuban Okumugwem,
emen Uwu Mbuban îra ikikput bene me obum egwe.
11 Okumugwem otetele ijo inu kan̄ inyi,
mè inyi ọmọ unye ire mgbọ geelek;
înyan̄a ibot isa irek ubọọn̄ inyi ọmọ,
mè inyi ọmọ ujuja ogboon̄ ubọọn̄ me Ijeren.
Solomọn
12 Solomọn, gwun̄ òriọọn̄ inu, oneniraka irek kan̄ ikup,
mè iluk me utelelek bak me lek kan̄.
13 Solomọn ìkeke ubọọn̄ mgbọ esuuk okupbe,
mije, Awaji îtap esuuk ikana otutuuk okike ijọn̄ inyi ọmọ,
inyi inama Uwu me erieen̄ kan̄,
Uwu Mbuban òbokup ire mgbọ geelek.
14 Iriọọn̄-inu kwun̄ mgbọ orebe ijija îmin enenen!
Ifuk-ibot ìjojot owu lek kubọk mun̄ ile okwaan̄ Nali omeen̄ ere.
15 Etip kwun̄ ìtataan̄ ikana linyọn̄,
owu ototo urọk kwun̄ òkikup udọk udọk ijot linyọn̄ gbak.
16 Etip kwun̄ îtaan̄ ire lek achọ geelek me okwaan̄ okwaan̄,
mîma owu si mije okpulube me esuuk.
17 Okwa kwun̄, mè urọk kwun̄, mè nke okito,
mè ifọọk okifọọk ebi ene îririin̄ ebi ido geelek me linyọn̄.
18 Owu osa me erieen̄ Okumugwem Awaji,
ogwu ekigwen Awaji ebi Ijeren,
ikukọ alata araran̄ kubọk ìre alala ikike,
mè ikwọọk alata okuket ijot ere kubọk ìre oporolo.
19 Ire, owu ojit lek itele inyi ebibaan̄,
mè ikana usun̄ inyi ijo ulọk ebek okaan̄be me lek kiban̄.
20 Owu osa okpa iken umin kwun̄,
mè ichaka owot iman kwun̄ mbuban me lek,
mè isa uyok uyok unaan̄-ejit ikeme bọn kwun̄,
mè isa ufieejit inyi ema bak me lek mbubut kwun̄,
21 mije, ogboon̄ ubọọn̄ ochebe iba,
ofifi ubọọn̄ onanan̄a me Iferem isibi me unye-ibot.
22 Ire, Okumugwem ìkakitele nsan kan̄,
ìkakifafiat si ubọk ikwaan̄ kan̄ geege;
ìkabochep owot iman ogwu îgobobe,
ìkpofafiat si ototun̄ ukan̄ ogwu òmama ọmọ.
Eya orọ îtelebe ibe ene esik enyi Jekọp,
mè inyi Debit ugwun̄ ijọn̄ òtitibi isibi me lek kan̄.
Reyobuwam melek Jerobuwam
23 Solomọn onenikwu ifo igọọk ebi nte nte kan̄,
mè itele ene ge me lek bọn ebirieen̄ kan̄,
ikpele ogwu mbubut ikakaan̄ge nden̄,
òrere Reyobuwam, ogwu òtap ebi ene unye-ibot mije ubọk îdọmọbe mkpulu kan̄.
Jerobuwam gwun̄ kè Nebat onenirọ ebi Ijeren erọ ijo inu,
mè itap ebi Iferem me oniin̄ ijo inu.
24 Ijo inu kiban̄ okpọkpọ ikiwa,
mege ekpulube ema me usun̄ akọn̄ isan̄a me ido kiban̄.
25 Kpunu ijo inu geege eyi ema ekarọge,
mege, Okumugwem obeben useen̄ ijo inu kiban̄ itoon̄ ema me ibot.