Josuwa mè Kelep
46
Josuwa gwun̄ kè Nun ìre unye ene me akọn̄,ọmọ obọkọ irek kè Mosis me ikwaan̄ nriran.
Ibot erieen̄ kan̄ ìre ogwu unyan̄a,
ọmọ okakana si ikpele ogwu unyan̄a inyi ebi Awaji ogobobe,
sa me irọrọ ebi ochicha ìkije ikeme ema useen̄ inu,
mè isa me ikeya ibọkọ ìrot ebi Ijeren inyi ebikaan̄.
2 Îjaan̄ enenen mgbọ ọmọ obenebe ubọk
imumen oge akọn̄ kan̄ isa isi akọn̄ me lek ama cha!
3 Sabum ọmọ, ìre ekene onye ejit me akọn̄ isoon̄ ọmọ?
Îre akọn̄ Okumugwem ke ọmọ otim.
4 Ìre ìkare bak me lek kan̄ ke ura okeke ikam me akpat ge,
egwe ge onenijọn̄ọ ikup kubọk ìre egwe iba ni?
5 Îgwen Ogwu Òbebene Ichit, òrere Ogwu Unye ya,
mgbọ ebi ochicha egbanbe ikana ọmọ me okokop;
ikpele Okumugwem ofọfọọk otu uriaak kan̄,
mè irọ ibe ibot mgbọlọ òkigbaan̄ ere irep.
6 Îsa akọn̄ itap ebi ido ya anyọn̄ me chieen̄,
mè ijijaka ema me lek osiki ogoon̄,
inyi ebi ido geelek eriọọn̄ unye kan̄ me akọn̄,
mè eriọọn̄ ibe ke ọmọ ìkitim akọn̄ Okumugwem,
mije, ọmọ ìre ogwu òkekeke inye
ikigọọk Ogwu Unye.
7 Me ukot kè Mosis, ọmọ îsiki lek irọ ikwaan̄,
ọmọ mè Kelep gwun̄ kè Jefune.
Ema mîje ikeme ebi ido kiban̄,
mè ikwek ibe ekarọ ijo inu,
mè irọ ibe ikpak ikpak nana-lek kiban̄ iwọ.
8 Ene iba kechi gaalek ke etele me ugwem
me etete efit obop ene gweregwen
ìjeje ukot ukot me emen èwê,
inyi esa ebi Ijeren enetap me inyọn̄ ijọn̄ Awaji onyibe ema me ìrot,
ijọn̄ òkisibi anam mè mfut.
9 Okumugwem onyinyi Kelep unye,
eyi îkaan̄be mege ire ukan kan̄,
mè ikọt ije inene lek ijọn̄ ogoon̄ ogoon̄ ya,
eyi bọn kan̄ enibọkọ me ìrot,
10 inyi otutuuk bọn kè Ijeren emun̄
ibe ke înwọn igọgọọk Okumugwem.
Ebi Oyerebet
11 Ebi oyerebet si, ogwu ikup mè erieen̄ eyi kan̄,
ebi ejit kiban̄ ìkafo lek mkpọmfaka,
ebi kpejuuk Okumugwem itele,
kè erieen̄ kiban̄ ikachep!
12 Kè ukwuuk kiban̄ ikup me udọn̄-ufuun̄ ikisek,
kè erieen̄ kiban̄, ebi enyibe umin,
ikpọk iluk ugwem me emen bọn kiban̄.
Samien
13 Samien ìre ogwu Ogwukaan̄ kan̄ omabe,
ogwu nriran Okumugwem,
ọmọ oto adasi ubọọn̄ me Ijeren,
mè itọkọ aran̄ me ibot ebi ibot mkpulu
inyi ekekpulu ebi kiban̄.
14 Îsa Ikan Okumugwem ikisibi oyerebet inyi urum ebi ene,
Okumugwem okekikpọ ebi kè Jekọp chieen̄ me lek.
15 Ichechieek kan̄ ke esa ibọkọ ọmọ itap kubọk ogwu nriran,
ikọ kan̄ ke esa iriọọn̄ ọmọ
kubọk ogwu òmọọn̄ inu ògbegbe utoon̄-ejit.
16 Îgwen Okumugwem, Ogwu Unye ya,
mgbọ ebi ochicha ekanabe ọmọ okokop,
isasa gwun̄ arọọn̄ òkinwọ ebe igwa ngwugwa.
17 Okumugwem okukup me emen inyọn̄ isook ida kubọk isinyọn̄,
enọnọ ikpele ida kan̄ okinunuun̄;
18 ikpakpan̄ ebi ibot ebi ochicha,
mè otutuuk ebi ibot mkpulu ebi Filisia.
19 Sabum mgbọ ìbosi isiki efuuk ire mgbọ geelek onire,
îkeke ata-ikọ me isi Okumugwem
mè isi ogwu ubọọn̄ îtọkọbe aran̄ me ibot ibe:
“Ǹkabọkọ ene geege ijọn̄,
ikerere ukpọk ukpọk lek ikpukot,
ǹkabọbọkọ si me ubọk ene geege!”
Ene geege si ìkatoon̄ ọmọ ikọ geege.
20 Ikerere mgbọ îkwube iraka, îben si nriran,
ikitumu inyi ogwu ubọọn̄ ike mkpa kan̄ oboje inu;
ikup me udọn̄-ufuun̄ iben nriran,
inyi mêtutukube ijo inu isan̄a me etete ebi Ijeren.