Mosis
45
Okumugwem îsan̄a enerieen̄ geòrọriọọn̄ ọmọ isibi me owot iman kè Jekọp,
ogwu òneneme otutuuk ene iso,
ogwu Awaji melek ebilene emabe,
enerieen̄ ya ìre Mosis ogwu ikekeek erieen̄ kan̄ okire ugbana.
2 Îrọ ọmọ ikaan̄ umin ikike melek ebi osat,
mè inyi ọmọ unye, ebi ochicha kan̄ ekekitet ukpook me lek kan̄.
3 Sa me lek ikọ kan̄, uyeke inu îrọ,
Okumugwem onyinyi ọmọ umin me isi ebi ubọọn̄;
înyi ọmọ ikan kan̄ îsabe inyi ebi kiban̄,
mè ichili ujamgbugbo kan̄ ibook ijeen̄ ọmọ.
4 Mije îkekebe inye mè isiki lek, isusun̄ ọmọ mbuban,
mè igobo ọmọ isibi me etete otutuuk ebilene.
5 Îtele ibe inọ ida kan̄,
mè isa ọmọ inin̄ emen oduku inyọn̄ òdudun;
înyi ọmọ Ikan isi me isi,
Ikan eyi ugwem mè ifuk-ibot,
inyi ijeen̄ bọn kè Jekọp inu
Okumugwem otọbe ibe ema erọ,
mè ijeen̄ bọn kè Ijeren orọmijọn̄ kan̄.
Erọn
6 Okumugwem îbene Erọn, ogwu òkup mbuban kubọk Mosis,
ogwu ngwan̄, mè ogwu otoko Libai.
7 Îrọ inyan̄a-ibot eyi kpotabe melek kan̄,
mè inyi ọmọ irek ibe ire ogwu ngwugwa inyi ebi ene;
îsa ujuja ekwut ibala ọmọ lek,
mè itap ọmọ àwurukù òkakaan̄ umin.
8 Îken ọmọ nken òjajaan̄ uja enenen,
mè inyi ọmọ inu òkijeen̄ ibe ke mînyi ọmọ unye,
òrere: ekwut edim mgbidim ukot, mè àwurukù inyọn̄,
mè mgbidim ofọnti ikwaan̄.
9 Mfut pomegaranet okana lek àwurukù ya,
mè owuwa egiriga alata araran̄,
òkisan̄a amọn mgbọ geelek îjibibe ukot,
inyi ekenọ ida kiban̄ me emen Uwu Mbuban,
ufuna bọn ebi kan̄ mêsabe ikikeek.
10 Înyi ọmọ ofọnti mbuban eyi alata araran̄ mè oluku oluku,
mè eyi irio irio, òrere ubọk ikwaan̄ ogwu òlọk ekwut;
mè Urim mè Tumim ekisa ido nkeek Okumugwem;
11 melek ekwut osabe eri eje eje ilọk,
òrere ubọk ikwaan̄ ogwu òlọk ekwut;
mè ewuuk unye otu ewe etibibe kubọk iman̄ òriọọn̄,
mè isa alata araran̄ ikat ikana,
òrere ubọk ikwaan̄ ogwu ikwaan̄ alata,
eyi ekisa ikeek erieen̄ otoko ebi Ijeren
erọkọbe me lek ewuuk cha ge ge.
12 Înyi ọmọ okpibot ubọọn̄ alata araran̄ ikwuun̄
me inyọn̄ akisi ibot kan̄,
eyi etibibe iman̄ òriọọn̄ me lek ibe:
“Ìkup Mbuban inyi Okumugwem,”
eyi òsusun̄ ọmọ esese me oniin̄ òjijibi ọmọ ibene,
erọriọọn̄ ubọk ibala,
ujuja ikwaan̄ atalek ogwu usọ orọbe,
òrere inu chieen̄ omabe ikekikpọ.
13 Inu keyi òjajaan̄ ito mgbugbo
ìkararak ìkup sabum ọmọ onisibi,
ene geege si ìkararak ìsa ìbala lek,
îtata nsabọn kan̄ gaalek,
mè ebi owot iman kan̄, mege isi ire mgbọ geelek.
14 Ngwugwa kan̄ ebekiwọwọp iriọk,
mgbọ iba iba me usen geelek.
15 Mosis ofaka ikwaan̄ itap ọmọ me ubọk,
mè itọkọ ọmọ aran̄ mbuban me ibot;
eyi òrere inyan̄a-ibot kpotabe òkup inyi ọmọ,
mè owot iman kan̄ ire mgbọ geelek akpabin inyọn̄ môkupbe ire,
inyi ema ekesi ikwaan̄ enyi
Okumugwem kubọk ebi ngwugwa,
mè ekegbana ebi kan̄ me erieen̄ kan̄.
16 Okumugwem ìgobo ọmọ
me etete otutuuk ebi ìkup me ugwem,
ibe ikigwa ngwugwa inyi ọmọ,
mè ikiwọp nsensi idun̄u utop olu kubọk okpọkọ emen akpan,
isa ikirọ esuuk me ibot ebi ene.
17 Îsa ikan kan̄ itap me ubọk kè Erọn ibe ikpọ chieen̄ me lek,
mè inyi ọmọ unye me lek ikan egebe isun̄,
ibe isa ikijeen̄ bọn kè Jekọp orọmijọn̄ kan̄,
mè isa Ikan kan̄ itap bọn kè Ijeren me utoon̄.
18 Ebi ofifi ene etoto ọmọ mba me emen èwê,
mè itaka otọt ije ikeme ọmọ,
Datan mè Abiram mè ebi kiban̄,
mè Kora mè ebi melek kan̄,
ekakaan̄ ijo ejit mè uyok uyok unaan̄-ejit me lek kan̄.
19 Okumugwem omumun̄, ìkabele ejit;
inanaan̄ ejit enenen,
mè isa uyok uyok unaan̄-ejit kan̄ ikpan̄ ema isan̄a;
îrọ uyeke inu òririki ema lek,
mè isa ukan̄ kan̄ òkisasak itaka ema iriọk.
20 Inenirọ Erọn imin isọkọ lek,
mè inyi ọmọ ìrot;
mè inyi ọmọ adasi mfut ònwọnwọn ichit,
inyi ikikaan̄ inorie òwawa inan̄a me lek adasi mfut.
21 Ema ekirie inorie ngwugwa Okumugwem,
eyi Okumugwem onyibe ọmọ mè ebi owot iman kan̄.
22 Ire, me lek ijọn̄ ebi kiban̄, ìkakaan̄ ìrot geege,
me etete otutuuk ene, ọmọ gaalek ke kpenyi uche,
mije, Okumugwem me lek kan̄ ore uche kan̄,
mè ìrot kan̄.
Fineyas
23 Fineyas gwun̄ kè Elieja ore òso ene ita me irek umin,
mije ulọk îkaan̄be me itetet ukpook Okumugwem;
ọmọ gaalek onye ejit,
mè isa otutuuk ugwem kan̄ ichieek mkpa ikeke inye,
me mgbọ ebi ene ejitbe Okumugwem itele;
sa me ikeya ke îrọ esuuk me ibot ebi Ijeren.
24 Eya orọ, Okumugwem onyanyan̄a ibot eyi esuuk melek kan̄,
mè irọ ọmọ ogwu ibot me Uwu Mbuban,
mè irọ si ọmọ ogwu ibot ebi kiban̄,
mè ibe umin ogwu òban Awaji ikup inyi ọmọ
mè ebi owot iman kan̄ ire mgbọ geelek.
25 Ike înyan̄abe ibot melek kè Debit,
gwun̄ Jesi ogwu otoko Juda,
ibe ke ogboon̄ ubọọn̄ ìbokinan̄a me ubọk gwun̄ kan̄ ge
inin̄ me ubọk ofifi gwun̄ kan̄,
ikeya si, ìrot kè Erọn ìkup inyi bọn owot iman kè Erọn gaalek.
26 Mgbọ yi, enyi ebi ngwugwa, ìtọn̄ Okumugwem,
ogwu ònyinyi enyi umin.
Kè Okumugwem itap enyi iriọọn̄-inu me ejit,
inyi enyi ekesibi oyerebet ònenen enyi ebi kan̄,
ufuna inu ikatele ijeje ijaan̄ enyi me lek,
inyi umin ebi kan̄ môkup
ire lek otutuuk ebi owot iman kiban̄.