Okwa ekọtbe isa itọn̄ ebi nte nte kiji
44
Eji enekọt okwa etọn̄ ebilene ebi ìsisibi isi,ebi nte nte kiji me ukot echi kiban̄.
2 Okumugwem înyi ema ikpele umin,
mè inyi ema umin kan̄ bene me ibebene.
3 Îkaan̄ ebi ìkpukpulu ido kiban̄,
mè itaan̄ etip sa me unye ema ekaan̄be;
mè ebi ìnyinyi nteme bak me lek iriọọn̄-inu kiban̄;
mè ebi ìbeben nriran.
4 Îkaan̄ ebi ìsasa nteme kiban̄ ikpulu ebi ene,
mè isa si iriọọn̄-inu ofolek orọmijọn̄ kiban̄ igbaalek;
ikọ ema ekitumu isa inyi ene nteme,
îjeen̄ ibe ke ema mîriọọn̄ inu.
5 Îkaan̄ ebi ìkisan̄a okwa isibi,
mè ebi ìkigege.
6 Usini kiban̄ mîbọọn̄ ubọọn̄ mè ikaan̄ unye,
mè ikiluk me uwu kiban̄ me esuuk.
7 Ebibi otutuuk mîbọkọ umin me ukot echi kiban̄,
mè ire ebi ekisa igugo lek me mgbọ echi kiban̄.
8 Erieen̄ usini kiban̄ îbia,
ebi ene ekitọtọn̄ ema ire chereyi.
9 Usini kiban̄ kpetele erieen̄ geege esabe ikikeek ema,
ebiba ekwakwaan̄ ichep kubọk kpekukup;
ema ekup kubọk kpemaman ema isibi inyọn̄,
ema mè bọn ìgọọk ema me udun̄ ìre inu yaage.
10 Ire, ebibi si ìre ebi ìrọriọọn̄ Okumugwem,
ebi ebi ene kpewuuk ata irọrọ kiban̄.
11 Inu ubọọn̄ kiban̄ îbia inyi ebi owot iman kiban̄,
ìrot kiban̄ okukup inyi bọn bọn kiban̄.
12 Bọn owot iman kiban̄ ekitetet inyan̄a-ibot Okumugwem inye,
ikeya si ke bọn bọn kiban̄ ekirọ
bak me lek ebi nte nte kiban̄ erọbe.
13 Owot iman kiban̄ môkup ire mgbọ kpotabe,
etip erieen̄ kiban̄ môtaan̄ ire mgbọ geelek.
14 Efuun̄ akpalek kiban̄ me esuuk,
ire, erieen̄ kiban̄ ìbokukup me ukot me ukot.
15 Ebi ido geelek mêkpa iriọọn̄-inu kiban̄ ikana,
ebi ene mêtọn̄ ema me emen ntitiin̄.
Enọk
16 Enọk îrọ inu òbele Okumugwem ejit, ebeben ọmọ ifo emen inyọn̄;
inenire inu ijejeen̄ ofolek igwugwu ikom me ijo inu,
inyi ebi ukot geelek.
Nuwa
17 Nuwa ìre ogwu ata irọrọ ogwu kpunube itap-otu me lek,
mgbọ Awaji onaan̄be ejit uyok uyok,
ọmọ osun̄ owot ebilene me ugwem;
îre mije kan̄ ke esik ebilene me linyọn̄
mgbọ mun̄ ile onube.
18 Okumugwem onyanyan̄a ibot
òbokup ire mgbọ geelek inyi ọmọ
ibe ke mun̄ ile ìkpoyaka ikpọk ijijaka ugwem inu geege ofifi.
Ebereyam
19 Ebereyam ore ikpele nte nte owuwa ido,
kpunu ene geege òkakaan̄ umin ibet lek kan̄.
20 Îsun̄ Ikan Ogwu Òbebene Ichit,
mè inyan̄a ibot melek kan̄;
îsa anam akpalek kan̄ irọ inyan̄a-ibot ya ijot,
mè ikeke inye me ichechieek
mgbọ Okumugwem otọbe ọmọ ikpọ.
21 Eya orọ, Okumugwem onyanyan̄a ibot ichieek ọmọ use,
ibe ke mêsa me lek bọn kan̄ igbana otutuuk ido geelek,
mè irọ mè ọmọ imumana iwa kubọk mfuun̄ òkup me ijọn̄,
mè ijibi bọn owot iman kan̄ ibene kubọk ntoronyan̄,
mè inyi ema ijọn̄ me ìrot inan̄a me uga okwaan̄ ire uga okwaan̄,
mè ibene me okwaan̄ Yuferetis isi ire okputut linyọn̄.
Ajiki mè Jekọp
22 Okumugwem îchieek Ajiki use yaage,
mije kè Ebereyam ogwu ute.
Îben use igbagbana otutuuk ebilene,
23 melek inyan̄a-ibot ya, initoon̄ Jekọp me ibot;
îsa ugbana kan̄ irọ ọmọ ijot,
mè inyi ọmọ ijọn̄ ya me ìrot;
îche ijọn̄ okpọkọ okpọkọ,
mè idọmọ inyi akọp mè otoko iba.